Mboweni nou bekommerd oor Moody’s

Tito Mboweni, minister van finansies. Foto: Shayne Robinson/SAPA

Tito Mboweni het sy kommer uitgespreek dat Moody’s nie Suid-Afrika se beleggingskredietgradering van Baa3 gaan behou wanneer dié agentskap vandag (Vrydag) sy assessering uitreik nie.

“Fitch is ook glad nie beïndruk met ons nie. Hulle het aan ons gesê dat ons nie naasteby genoeg gedoen het nie. Moody’s het gesê dat hy Vrydag sy verslag sou uitreik en ons kyk tans baie versigtig na ons fiskale standpunt,” het Mboweni Donderdag gesê tydens ʼn gesamentlike sitting van die parlement se staande en geselekteerde komitees van finansies en sy geselekteerde komitee van toedelings.

“Dit lyk glad nie goed nie,” het hy bygevoeg.

Die kommer wat hy uitgespreek het, kom ʼn dag nadat Mboweni sy mediumtermynbegrotingsrede ter tafel gelê het. Hierin is Suid-Afrika se groeivooruitsigte vir die jaar gesny tot slegs 0,5%. Mboweni het ook gewaarsku dat, soos dinge nou staan, Suid-Afrika se skuldlas teenoor sy bruto binnelandse produk meer as 70% sal wees.

Die minister is uit alle oorde gekritiseer omdat hy nie maatreëls getref het om Eskom se skuldlas te herstruktureer nie, wat as die grootste risiko vir die land se ekonomie geag word.

Moody’s is die laaste van die groot internasionale graderingsagentskappe wat Suid-Afrika se skuld as beleggingsraad geag het. Sekere ekonome bespiegel egter dat Moody’s moontlik nie die land se kredietgradering botweg gaan afgradeer nie, maar dat hy slegs sy vooruitsigte na negatief sal wysig.

Dit is egter steeds nie goeie nuus nie omdat die volgende logiese stap dan ʼn afgradering sal wees.

S&P Global en Fitch, die ander groot graderingsagentskappe, het reeds die land se skuld afgradeer na sub-beleggingstatus, ook bekend as rommelstatus.

“Daar sal geen oorweging wees om vir Eskom skuldverligting te bied totdat die beleërde kragverskaffer nie enige toewyding of vordering toon in die implementering van die ontbindingsbloudruk wat deur Pravin Gordhan, minister van openbare ondernemings, die week bekend gemaak is nie,” het Mboweni Woensdag gesê.

Hy het weer gewaarsku dat finansiële hulp aan openbare ondernemings nie meer in die vorm van lenings gebied gaan word nie. “Die land is op pad na ʼn skuldstrik. Die enigste manier waarop ons hier uit gaan kom, is om uitgawes te sny en om sekere bates te verkoop.”

Mboweni het verder teruggekap na kritici wat gesê het dat die skuld nie die probleem is nie, maar eerder waaruit die skuld bestaan. “Natuurlik maak skuld saak, want dit is die eerste aftrekking op die land se fiskus. Dit beteken dat daar minder geld vir gesondheidsorg, opvoeding en ander dienste is.

“As jy nie ʼn reserwe geldeenheid- land is nie, kan jy sweerlik nie die hoë skuldvlakke bekostig nie,” het hy afgesluit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
wraggies

Wat verwag jy Mboweni, jy kan seker nie verras wees nie, of is julle weer “geskok”.

Haarmald

Ek dink die wigte en teenwigte gaan vandag inskop.

Leon

Hulle wil nie SEB en grondgrype en minimum lone afskaf nie, so ons gaan maar net verder onder. Die skippie bly maar net sink omdat hulle meer en meer albatrosse inlaai.

marous

Een rat bestuur vir 26 jaar en dit was oop ketels ….agteruit . Wat het hierdie mense
verwag ?

Jaco

Ek is nie n ekonoom nie maar ek kan nie sien dat Moody’s net stabiel na negatief gaan verander nie. Stel die onafwendbare net verder uit en sit die buitelandse beleggers onder groter risiko