McDonald’s sê jammer ná padda-voorval

McDonald’s het die Bezuidenhout-gesin van Secunda, Mpumalanga – wat ’n dooie padda in een van hul wegneem-burgers gevind het – om verskoning gevra oor die manier hoe die restaurant die voorval hanteer het.

Dít nadat die restaurant die aand van die voorval nie die gesin vir die besmette burger wou vergoed nie en ook geweier het om ’n vars burger te maak.

Die kitskosrestaurantgroep het vroeër die week telefonies met die gesin kontak gemaak en erken dat die betrokke restaurant die situasie beter kon hanteer het. Die restaurantgroep het ook beloof om die volle koste van die gesin se ete terug te betaal.

Volgens Willem Bezuidenhout het die restaurantgroep ook aan hom gesê dat die blaarslaai op die burgers direk van die verskaffer af kom en dadelik gereed is om te bedien. “Hulle het erken die blaarslaai word nie gewas voordat dit op die burgers geplaas word nie,” sê hy.

Willem sê die restaurant het die gesin egter nog nie om verskoning gevra oor die padda wat sy 13-jarige dogter in haar McChicken gekry het, of erken dat dit hulle skuld is nie.

Maroela Media het vroeër berig die tiener het verlede Vrydag enkele happe uit haar burger geneem voordat sy die pootjies van ’n padda sien uitsteek het. Die padda was met mayonnaise besmeer en reeds dood.

Willem se vrou, Angeline, het eers McDonald’s se kliëntediens gebel en is toe na McDonald’s, waar sy die burger aan die vloerbestuurder gewys het, maar geen antwoorde of hulp gekry het nie.

Volgens Willem het die vloerbestuurder die gesin ook nie om verskoning gevra nie en die skuld op die afleweringsdiens geplaas.

Die restaurantgroep het intussen ’n ondersoek na die voorval gelas en Vrydag aan Maroela Media gesê die ondersoek is nog nie afgehandel nie.

McDonald’s het Willem laat weet dat hulle Vrydag die burger – wat tans in die gesin se yskas gehou word – sal kom haal.

Die restaurantgroep het in ’n e-pos aan Willem verduidelik in die geval van klagtes waar ’n “vreemde voorwerp” in ’n produk gevind word, word die produk ingesamel vir verdere ondersoek. Sodoende sal die restaurant die bron van die vreemde voorwerp probeer identifiseer.

“Gevalle waar ‘vreemde voorwerpe’ in die kos gevind word, is egter baie skaars binne ons stelsel,” lui die e-pos vanaf die restaurantgroep, wat Maroela Media onder oë gehad het.

Willem het ’n inskrywing oor die voorval op Facebook gemaak en sê die reaksie op dié plasing het sy verwagtinge oortref.

“Die oorgrote meerderheid van die mense op sosiale media vind aanklank by die debat oor voedselveiligheid in die kitskosbedryf en lewer ’n positiewe bydrae tot die onderwerp.”