Richard Mdluli
Aanklagte van moord en poging tot moord wat verband hou met die dood van Oupa Ramogibe gaan nie weer teen die voormalige misdaadintelligensiebaas Richard Mdluli ingestel word nie.
Sommige aanklagte, waaronder aanranding, intimidasie en dwarsboming van die gereg, is vandeesweek weer deur die Nasionale Vervolgingsgesag, teen Mdluli ingestel.
Johan Kriegler, die voorsitter van Freedom Under Law (FUL), het Woensdag bevestig dat die nasionale direkteur van openbare vervolging aanklagte wat verband hou met die moord op Ramogibe weer ingestel gaan word, behalwe die aanklagte van moord en poging tot moord.
FUL is ingelig dat die direkteur opdrag aan senior staatsaanklaers gegee het om die aanklagte van bedrog en korrupsie teen Mdluli te hersien. “Dit het egter nog nie gebeur nie, en ons het geen idee wanneer dié stappe gedoen gaan word nie,” het Kriegler gesê.
Die NVG het Dinsdagaand bekendgemaak dat sommige aanklagte weer teen Mdluli ingestel gaan word, maar het nie gesê wat dié aanklagte is nie. “Ons het besluit watter aanklagte weer ingestel gaan word,” het Nathi Ncube, woordvoerder van die NVG, toe gesê. “Dit is aan die Freedom Under Law (FUL) en Mdluli gekommunikeer.”
Mdluli is geskors nadat klagtes aan die lig gekom het van bedrog en korrupsie en klagtes wat met die moord in Februarie 1999 van sy eksminnaar se man, Ramogibe, verband hou. Hy het glo familie en vriende as intelligensiebeamptes in diens geneem en polisiegeld misbruik om luukse motors aan te koop.
Die aanklagte van bedrog en korrupsie is op 14 Desember 2011 teruggetrek. Mdluli is in Maart 2012 weer as die hoof van misdaadintelligensie aangestel. Die NVG het ʼn maand later voorlopig die moordklagte teruggetrek hangende ʼn ondersoek.
Nathi Mthethwa, voormalige minister van polisie, het in Mei 2012 aangekondig Mdluli sal van misdaadintelligensie na die kantoor van die adjunk nasionale polisiekommissaris vir bedrywighede oorgeplaas word. Hy is later daardie maand vir ʼn tweede keer geskors toe bewerings uit die ondersoek na Ramogibe se moord, aan die lig gekom het. Die ondersoek het hom egter in November 2012 onskuldig verklaar aan enige betrokkenheid by die moord. Mdluli en drie ander is van die moord beskuldig en het ook aanklagte van intimidasie, ontvoering, aanranding met die doel om ernstige liggaamlike skade aan te rig, poging tot moord en sameswering om moord te pleeg, in die gesig gestaar.
Ramogibe het glo doodsdreigemente ontvang nadat hy met die vrou, wat vroeër Mdluli se minnaar was, getrou het. Hy is aangesê om haar te verlaat of hy sal doodgemaak word. Hy het ʼn saak van poging tot moord oopgemaak voor sy dood.
Mdluli was in daardie stadium bevelvoerder by die Vosloorus-polisiestasie in Boksburg, oos van Johannesburg. Hy is daarvan beskuldig dat hy die ondersoek saboteur het.
Die hoogste hof van appèl het in April ʼn beslissing deur die Pretoriase hooggeregshof, dat die aanklagte van bedrog en korrupsie teen Mdluli nie teruggetrek moet word nie, bevestig. FUL het die Pretoriase hooggeregshof genader om die besluit om klagtes teen Mdluli weer in te stel, ter syde te stel. -SAPA
