Mededingingskommissie begin ondersoek na Vodacom

Argieffoto

Die Mededingingskommissie het met ’n ondersoek begin na Vodacom vir beweerde misbruik van oorheersing nadat die maatskappy ’n eksklusiewe kontrak met die Nasionale Tesourie gesluit het om die enigste verskaffer van mobiele telekommunikasiedienste aan die regering te wees.

Sipho Ngwema, woordvoerder vir die kommissie, het in ’n verklaring gesê voor Vodacom die eksklusiewe vier jaar kontrak met die Nasionale Tesourie aangegaan het, kon alle regeringsdepartemente mobiele kommunikasiedienste van enige netwerkoperateurs koop.

Ngwema het gesê die kommissie het inligting ontvang dat 20 regeringsdepartemente onderworpe sal wees aan die nuwe Vodacom-kontrak. “Ander departemente, insluitend staatsbeheerde instellings en munisipaliteite, sal aangemoedig word om die nuwe kontrak aan te neem.”

Volgens Ngwema het die kommissie redelike gronde om te vermoed dat die eksklusiewe kontrak strydig is met die Mededingingswet en ’n uitsluitende misbruik van oorheersing deur Vodacom kan wees.

Ngwema het gesê die wet verbied ’n dominante firma om sy oorheersing te misbruik deur (1) ’n verskaffer of kliënt te beïnvloed of te verhoed om met ’n mededinger handel te dryf en (2) om ’n uitsluitingshandeling te onderneem wat ’n onderneming se toetrede of uitbreiding binne ’n mark belemmer of verhoed, tensy die betrokke firma tegnologiese, doeltreffendheids- of ander pro-kompeterende winste kan toon wat die mededingende effek van sy handeling oortref.

Volgens Ngwema is die kommissie van mening dat die kontrak Vodacom se dominante posisie in die mark verder sal verskans, meer hindernisse tot gevolg sal hê vir toegang tot die betrokke mark, mededinging in die mark sal verdraai en sal lei tot ’n verlies in markaandeel vir ander netwerkoperateurs.

Die Nasionale Tesourie het in Maart 2016 ’n tender uitgereik vir die verskaffing van mobiele kommunikasiedienste aan nasionale en provinsiale regeringsdepartemente vir die tydperk 15 September 2016 tot 31 Augustus 2020. Vodacom is as die voorkeurverskaffer gekies nadat die ander bieërs in verskillende fases van die proses uitgeskakel is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
willie

Looi hulle! Ons gewone kliënte word lekker ingeloop met data en minute wat nie volgens beginsel van last in first out geld nie! Waarom verval ongebruikte data waarvoor jy betaal het in elk geval!

Heleen

Ek kanselleer beslis my kontrak sodra die verby is met vodacom.

Leahim

Ek hoop hulle kry n groot pak slae

hennie schutzler

Vodacom is waarskynlik ook die skelmste van alle maatskappye! Ek praat feite en van ondervinding!!!

Vodagaan

Stamp hulle