Medelye ná ‘sagmoedige reus’ in fratsongeluk sterf

Die Beyers-gesin. (Foto: Facebook)

Tientalle boodskappe van medelye stroom steeds in ná die dood van Van Zyl Beyers wat Vrydagmiddag in ʼn fratsongeluk dood is.

Beyers (24) was ʼn gewilde oudleerling van die Hoër Jongenskool Paarl, oftewel Boishaai. Sy ouers, Pieter en Helene, boer op die plaas Mineral Springs in die omgewing.

Beyers was ʼn plaasbestuurder op ʼn buurplaas en sou later die familieboerdery oorneem, het Helene Beyers gesê.

Volgens haar het Beyers vermoedelik aan ʼn hoogspanningsdraad bokant ʼn kweekhuistonnel geraak waar hy Vrydagmiddag besig was om te werk.

Die Drakenstein-plaaswag is inderhaas na die toneel, van waar verskeie nooddienste ook ontbied is. Hulle het Beyers op die grond aangetref, nadat hy van die leer waarop hy gestaan het, afgeslinger is.

“Gegewe die enorme ondersteuning en die noodradionetwerk, is alle toegangspaaie en -hekke oopgemaak en is geen tyd verspil [om by Van Zyl uit te kom] nie. Die reaksietyd kon nie vinniger gewees het nie.”

Luidens die plaaswag het paramedici bykans 45 minute lank vergeefs gespook om Beyers by te bring. “Ons gedagtes is met die familie wat ʼn enorme verlies moet verduur.”

Helene was ook op die toneel. “Ek het sy hand gevat en dit omgedraai. Ek het gedink dit is vol grond en wou dit skoonvee, maar toe sien ek dit is spierwit gebrand.

“Hy is dadelik doodgeskok,” het sy gesê.

“My kind… hy was so ʼn groot mens, maar hy het so ʼn klein hartjie gehad. Daar was só baie wat vir hom voorgelê het,” het Helene gesê.

“Van Zyl kon net alles doen. Hy was ʼn wonderlike mens wat nooit nee gesê het nie. Almal was lief vir hom,” het sy vertel.

Helene sê Beyers, wat ʼn allemintige 60 cm lank met geboorte was en tot meer as twee meter lank gegroei het, bly haar baba.

“Hy het altyd gespot en gesê ons moet nog ʼn baba hê sodat hy nie meer die babatjie is nie,” het sy gesê.

Sy het gesê haar man verwerk die gebeure nog bitter swaar.

Beyers het ʼn ouer broer, PC (29), en suster, Naudene (30). Helene het gesê sy vriendin, Marcelize Koen, is ook platgeslaan deur die gebeure.

Helene het gesê hulle word gedra deur die ondersteuning van die gemeenskap en dat selfs wildvreemdelinge aanbied om te help met enigiets van takies tot etes. “ʼn Mens is verstom oor hoeveel mense omgee.”

Boishaai het ook hulle medelye betuig. “Dit is met groot hartseer dat ons een van ons eie moet groet. Van Zyl Beyers (matriek 2013), oudstudent van HJS, is [Vrydagmiddag] oorlede. Sterkte aan die Beyers-familie, mag jul vrede ontvang in hierdie moeilike tyd. Van Zyl was ʼn ware Boishaaier en ʼn broer vir so baie van ons. Rus in vrede,” het die skool op sy Facebook‑blad geskryf.

Vriende van Beyers het hom onder meer beskryf as ʼn sagmoedige reus (gentle giant) en iemand wat die lewe met entoesiasme en oorgawe aangepak het.

‘n Begrafnisdiens vir Beyers word Vrydag om 11:00 by die Nederduits Gereformeerde Kerk Die Paarl (Strooidakkerk) gehou.

*Die berig is gewysig sedert dit aanvanklik gepubliseer is. – Red

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Liza

My innige simpatie aan die familie, het ‘n neef ook so verloor….

Mariaan

Agge nee..mens het net nie woorde nie..so jammer….ai

Sandy

Aai dis vreeslik hartseer. My innige meegevoel met die familie. Ek vertrou dat God julle sal dra in die moeilike hartseer tyd.

Chantel

Baie sterkte aan die familie en vriende in die moeilike tyd.. My gebede is by julle.

Sandra

Dalk eerder boys high??