ʼn Durbanse navorser sê die skole sardiens wat die afgelope ruk hul opwagting aan Suid-Afrika se kuslyn gemaak het, is die meeste wat hy nóg gesien het.
Dr. Ryan Daly, verbonde aan die Oseanografiese Navorsingsinstituut, het ook fassinerende onderwaterfoto’s van die verskynsel gedeel.
“Wat ʼn goudmyn van vis! Dit was oorweldigend met so baie sardiens. As ʼn navorser en iemand wat al jare lank die sardiens volg, was dit verstommend om die hoeveelheid te sien,” het Daly die afgelope week gesê.
Daly sê hy het gevrees dat veranderinge aan die omgewing moontlik die sardientjieloop negatief kan raak, maar dat dit nie die geval was nie.
“Dit is beslis die meeste sardiens wat ek nog ooit aan die KwaZulu-Natalse Suidkus gesien het. Weens klimaatsverandering, moontlike druk weens kommersiële visvang en veranderinge in die manier waarop diere op die omgewing reageer, was baie navorsers bekommerd dat groot sardientjielope iets van die verlede sou wees. Dit is dus fantasties om die oplewing in bedrywighede te sien. Dit voorspel ʼn fantastiese seisoen,” het Daly gesê.
Volgens hom was daar vanjaar ʼn gebrek aan inligting oor die sardientjieloop weens die Covid-19-pandemie.
“Ons weet nie werklik hoeveel aktiwiteit daar aan die Wildekus was, of hierdie net ʼn groep was wat hul opwagting aan die Suidkus gemaak het en of dit deur ʼn veel groter groep voorafgegaan is nie.”
Phelisa Mangcu, uitvoerende hoof van Ugu-Suidkus-toerisme (USCT), het beaam dat dit die beste sardientjieloop is wat die provinsie in ʼn lang tyd gesien het.
Mangcu sê die koue weer het die afgelope paar dae ook skole sardiens na plekke soos Sezela, Ramsgate, Scottburgh, Southbroom en Pennington gelok.
“Dit is net die begin van dié wintergebeurtenis en ons sien uit na nog heelwat aktiwiteit oor die volgende paar dae. USCT wil almal bedank wat plaaslike vissermanne in dié tyd ondersteun, asook diegene wat plaaslike restaurante en kafees ondersteun,” het sy gesê.
“Ons moedig almal aan om die nodige veiligheid- en gesondheidsprotokolle te gehoorsaam, wat insluit die dra van maskers, ontsmetting van hande en sosiale afstandhandhawing.”
Die mens wik en GOD beskik
Baie goeie natuurverskynsel, dankbaar
Dankie sardiens. Daar is darem nog een keer ‘n jaar ietsie in Suid Afrika wat vry is!
Dit is omdat die see ‘n bietjie kon asemhaal tydens die lockdown.
Dit is seker weer die skuld van aardverwarming soos gedryf deur die mens wat niks meer het om aan te dink nie.