Meester van hooggeregshof in Mpumalanga afgedank

Bina Mfandifuna Masuku (44).

Bina Mfandifuna Masuku, die meester van die hooggeregshof in Mpumalanga, is deur die departement van justisie en korrektiewe dienste afgedank.

Volgens Chrispin Phiri, woordvoerder van die departement, is Masuku (44) met effek van 8 November afgedank na ʼn dissiplinêre proses waartydens sy op aanklagte van wangedrag tereggestaan het.

Die aankondiging van die departement kom nadat Masuku Donderdag na ʼn maande lange ondersoek deur die Valke in hegtenis geneem is op aanklagte van bedrog, korrupsie, geldwassery en oortreding van die Immigrasiewet.

Ronald Lamola, minister van justisie en korrektiewe dienste, het in reaksie op Masuku se inhegtenisneming gesê dit is ontstellend dat ʼn persoon in die amp van die meester van die hooggeregshof in hegtenis geneem is weens ernstige aantygings van bedrog vir selfverryking.

“Ons verwag dat amptenare met omsigtigheid en onpartydigheid moet optree wanneer hulle met die boedels van oorledenes werk en begunstigdes hulle nader om toegang tot hul voordele te kry.

“Wanneer ons amptenare kies om korrup te wees in die uitvoer van hul mandaat, sal ons nie huiwer om hulle vir sulke optrede te straf nie.”

Masuku se kêrel, Elvis Kgosiemang (35), is Vrydag in hegtenis geneem. Die twee het Maandag weer in die Nelspruit-landdroshof verskyn en die saak is tot vandag uitgestel wanneer hulle na verwagting om borgtog sal aansoek doen.

Masuku het glo eise na Kgosiemang, wat homself as ʼn prokureur voorgedoen het, gestuur. Van die eisers het nooit hul geld ontvang nie aangesien Masuku en Kgosiemang dit glo vir hulself gehou het. Volgens kapt. Dineo Sekgotodi, woordvoerder van die Valke, is reeds vasgestel dat minstens R1,7 miljoen by agt verskillende gesinne gesteel is.

Verdere ondersoek het ook aan die lig gebring dat Kgosiemang nie ʼn prokureur is nie en dat Masuku nie ʼn Suid-Afrikaanse burger is nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Hoekom

Hoekom? Want ons word aangestel vir die verkeerde redes

Adrian

Nie n suidafrikaans burger nie!!!!! Wie het haar aangestel daai persoon moet ook aangekla word . Nou waar kom die vreemdeling vandaan ???? En haar boyfriend wie is die ????? Te veel vrae hoop nie hul kry borg nie

francois

En julle belasting geld het haar selaris betaal

AndrewL

Die legacy is hier om te bly.

Chris Ws

Die persoon/e wat haar aangestel het moet ook aangekla word.Hulle het ook nie HUL werk gedoen nie!