Meester van hooggeregshof in Pta gesluit oor ‘wanbetaling’

Die sluiting van die gebou kan talle regsprosesse tot stilstand laat knars. (Foto: Verskaf)

Pretoriase regslui staal hulle opnuut vir chaos nadat ʼn kennisgewing Dinsdag by die kantoor van die meester van die hooggeregshof opgeplak is wat lui dat die gebou Woensdag om 06:00 gesluit sal word en tot verdere kennisgewing nie toeganklik sal wees nie.

Luidens die kennisgewing word die gebou weens “onbetaalde huurgeld” gesluit.

Daar is oënskynlik ʼn dispuut tussen die verhuurder van die gebou en die departement van justisie. Adj.min. John Jeffery is reeds oor die stand van sake ingelig.

Tiaan Joubert, voorsitter van die Pretoriase Prokureursvereniging (PPV), sê die sluiting gaan die huidige situasie by die kantoor, “wat reeds benard is, net vererger”.

Joubert waarsku dat alles, van regsprosesse tot diegene wat onder kuratele staan (ʼn verpligte, geregtelike voogdyskap deur middel van die bestuur van onbevoegde persone se geldsake), geraak word. Dit sluit byvoorbeeld diegene in wat noodsaaklike mediese uitgawes het, welke uitgawes eers deur die meester goedgekeur moet word.

Benewens administratiewe probleme wat ondervind word, is die hofgeboue in ʼn swak toestand. Daar is geen lugversorging in die landdroshof- of hooggeregshofgebou nie. Nadat die siviele gedeelte van die Pretoriase-landdroshof sowat agt jaar gelede afgebrand het, is dié hof se personeel in tydelike kantore by die strafhof ingedeel, sê Joubert. Hulle is steeds daar.

“Die afgebrande dop staan nog. Daar is na bewering dispute met die kontrakteurs wat die hof moet herstel.”

Joubert sê personeel by dié howe is gewillig om te werk, maar steier weens gebrekkige infrastruktuur wat reeds sedert die 1990’s verwaarloos word.

“Die administrasie van die meester se lêers is swak en daar is geen verantwoording nie. Dit duur tot ses maande om ʼn eksekuteursbrief uit te reik,” sê Joubert. Die probleme is boonop nie beperk tot Pretoria nie, maar word landwyd by kantore van die meester ondervind.

“Die aktekantoor vaar die beste omdat dit goed bestuur word en toelaat dat die Prokureursvereniging hom in krisistye bystaan.”

Die vereniging het in 2020 onder meer ingegryp om ʼn geweldige agterstand by die Pretoriase hooggeregshof uit te wis nadat Covid-19-maatreëls onder meer tot groot probleme daar bygedra het. Hulle het eindelik meer as 4 600 agterstallige dagvaardings uitgereik, meer as 1 700 onbestrede aansoeke verwerk en meer as 1 300 geregtelike sake help bestuur.

Staatsgeboue word onderhou en bestuur deur die departement van openbare werke, maar Joubert sê die skuld vir administratiewe probleme word “soos ʼn bal tussen die departemente gegooi”.

Die stad se aktekantoor is in November verlede jaar ook gesluit nadat die krag na die gebou afgesny is. Die kantoor is een van die besigste aktekantore in die land, maar registrasies en die bestuur en instandhouding van die land se eiendomsregister het tot stilstand geknars ná ʼn betalingsdispuut tussen die departement van openbare werke en infrastruktuur en die Tshwane-metroraad.

• Die kantoor van die hoofregter het navrae na die departement van justisie verwys. Die departement se kommentaar sal bygewerk word sodra dit ontvang word.