‘Meesterbrein’ van daggasmokkelnetwerk aangekeer

Die meesterbrein word in die polisievoertuig gelaai (Foto: Verskaf)

Die beweerde meesterbrein van ʼn daggasmokkelnetwerk is Maandag saam met nog twee verdagtes in Mahikeng in die Noordwes in hegtenis geneem. Dié trio het glo dagga onwettig van Swaziland in die land in gesmokkel en in Mahikeng en omliggende dorpe verkwansel.

Een van die verdagtes is ʼn lid van die Suid-Afrikaanse Nasionale Weermag (SANW).

Kapt. Tlangelani Rikhotso, woordvoerder van die Valke, sê ʼn gesamentlike operasie deur die Valke, die polisie se honde-eenheid, die grenspolisiëringseenheid en die batebeslagleggingseenheid het tot die verdagtes se inhegtenisneming gelei.

Die verdagtes word ook van geldwassery-aktiwiteite verdink.

Die sakke dwelms waarop beslag gelê is (Foto: Verskaf)

Die beweerde meesterbrein is ook in Februarie vanjaar in hegtenis geneem vir die besit van dagga ter waarde van ongeveer R600 000. Daar is vasgestel dat hy na bewering ook by die geldwassery-aktiwiteite betrokke was.

Met sy inhegtenisneming is daar op verskeie voertuie, waaronder twee BMW’s, twee Mercedes-Benz-voertuie, ʼn Corsa en ʼn Volkswagen Polo beslag gelê. Sakke vol dagga is ook in sy besit gevind.

Die meesterbrein en sy twee medebeskuldigdes, tussen 24 en 39 jaar oud, sal na verwagting Dinsdag in die Mmabatho-landdroshof verskyn. Hulle staan tereg op aanklagte van handeldryf in dagga en geldwassery.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Piet

Nou mors die polisie hulle tyd met die snert. Dagga is nie ‘n dwelm nie – dis ‘n krui. Ek het boeke oor boererade en elke derde remedie het dit in. EN DIT IS NOU WETTIG!

SomeOne

waar was hy tussen februarie 2020 en nou ?

Persheks

Gaan lekker as jy vir weermag werk! Kopdoek het dit dan goed gekeur en ou Tito ook vir die miljoene wat dit gaan in bring vir ekenomie… Mmmmm

Androclus

Die skoolkinders rook dagga voor die skool begin,dis geen kruie nie selfs laerskoolkinders rook dagga ek het met my eie oë gesien.Moenie verkeerde goed die groenlig gee nie.PIET

Grassie

Ek is bly dat die polisie nog optree teen daggasmokkelaars. Ek het al met baie dwelmverslaafdes gesels en die meeste van hulle vertel dat dagga die beginpunt van hul verslawingsgeskiedenis was. Na hulle ‘n ruk lank dagga gerook en aan die “hoog” daarvan gewoond geraak het, begin hul eksperimenteer met ander dwelms wat ‘n bietjie groter “hoog” het. Dit is so dat baie bossiedokters se medisyne dagga bevat en miskien help dit soms. Baie erkende medisynes bevat opiate – moet ons dan die gebruik van heroïen om daardie rede ook toelaat soos die geval is met dagga?