Meisie sterf na botsing wat ma en sussie eis

’n Agtjarige meisie is in die hospitaal oorlede nadat sy verlede week ernstig beseer is in ‘n motorongeluk wat haar ma en sussie se lewens geëis het.

Reinette Oosthuizen, woordvoerder van Mediclinic Bloemfontein, het aan Maroela Media bevestig dat Shene van Wyk (8) Dinsdagmiddag in die hospitaal oorlede is.

Lt. Sergio Kock, woordvoerder van die polisie, sê Shene was verlede week Woensdag saam met haar ma, Jumari (27), en twee sussies, Kiara (3) en Kyla (10), op pad om by hulle pa, Attie, in Prieska in die Noord-Kaap te gaan kuier toe hulle in ongeluk betrokke was.

Kock sê die gesin se dubbelkajuit-bakkie het teen ‘n ander bakkie gebots. Jumari en Kiara is in die ongeluk oorlede.

Kock sê die bestuurder van die bakkie het geringe beserings opgedoen. Die polisie ondersoek ‘n saak van strafbare manslag.