Meisieskole skop stof in ander se oë

Bloemhof op Stellenbosch, die oudste Afrikaanse meisieskool in die land, het die beste van alle staatskole gevaar en beklee die derde plek op die lys. Foto: Facebook

Meisieskole beklee al vyf top-posisies op ʼn lys van Suid-Afrika se beste akademiese skole, maar net twee van die top-presteerders is Afrikaansmediumskole.

Dit is van die bevindings deur die webwerf Business Insider nadat hy die uitslae van verlede jaar se nasionale seniorsertifikaat‑eksamen ontleed het.

Die enigste twee Afrikaanse skole wat die top‑tien gehaal het, is die Hoër Meisieskool Bloemhof op Stellenbosch in die derde plek en die Afrikaans Hoër Meisieskool in Pretoria in die vyfde plek.

Business Insider sê in die ontleding is net skole met minstens 20 matrikulante in aanmerking geneem en is die Onafhanklike Eksamenraad se eindeksamen buite rekening gelaat.

Die lys is saamgestel deur te kyk na die gemiddelde getal onderskeidings per leerder. Die 107 matrikulante van die top-skool, Herschel Girls’ High in Claremont, Kaapstad, het ʼn verstommende gemiddeld van 5,31 onderskeidings elk behaal.

In die tweede plek is die nabygeleë Springfield Convent Senior School met 4,14 onderskeidings per leerder. Dié twee skole is ook die duurste van die top-tien. Jaarlikse skoolgeld aan Herschel beloop R109 000 en aan Springfield R68 012,40.

Bloemhof, wat die derde plek beklee, is met jaarlikse skoolgeld van R30 560 die goedkoopste van die tien top-skole. Dié skool se leerders het gemiddeld 3,59 onderskeidings gekry.

Van die tien skole op die lys is ses in die Wes-Kaap, een in Pretoria en drie in KwaZulu-Natal. Met 220 matrieks is Affies verreweg die grootste van die top-skole. Die enigste groot gemengde skool (vir seuns en meisies) is Westerford High School in Kaapstad se suidelike voorstede, waar die helfte van die skole op die lys geleë is.

In ʼn afsonderlike ondersoek deur Business Insider na skole wat die Onafhanklike Eksamenraad se eksamen afgelê het, is bevind Helpmekaar-kollege in Johannesburg se matrikulante het die tweede beste gevaar.

Dagskoliere aan dié private skool betaal R74 800 skoolgeld per jaar, vergeleke met Kingsmead College se R139 370 en Roedean School se R152 982, wat volgens die webwerf se lys bewys die duurste skole lewer nie noodwendig die beste resultate nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
IK

Lesufi het werk . . .

Michael Bouwer

As n’ mens nou rerig wil weet hoe goed n’ skool presteer kyk na hulle graad 11 punte.

Wessel

In die derde laaste paragraaf moet dit lees “koedskool Westerd High”?

dejager

Daardie ‘top’ skole het na my mening nie hul sosiale en maatskaplike rol in die samelewing uitgevoer nie.My ondervinding is dat sogenaamde top skole begin met ń seleksieproses wat kinders met laer potensiaal uitsif.ń Kind met leerprobleme word nie toegelaat nie en as hy reeds toegelaat is dan het hulle elf jaar
tyd om hom uit te werk.
Dit is hartseer dat die skool se naam ten alle koste opgehemel moet word.Dit is bloot abnormaal dat ál die kinders A simbole kry.Dit is net so ń duidelike teken van ń disfunksionele onderwyssisterm as die skool waar almal druip.

Cobus

Met so min afrikaanse skole wat oorgebly het en so baie private skole is dit n wonderlike prestasie. Baie geluk !!