Mense maak harte oop ná hond 6-jarige beetkry

Klein Dian de Bruin (6) na die voorval.

ʼn Ma van Brits in Noordwes sê selfs wildvreemdelinge – en van heinde en ver – het hul harte vir die gesin oopgemaak nadat hul sesjarige seuntjie deur ʼn hond gebyt en inderhaas peperduur mediese behandeling moes ondergaan.

Dina en Tjaan de Bruin se seuntjie, Dian, het verlede Vrydag ernstige wonde aan sy gesiggie opgedoen toe die gesin se hond, ʼn kruising tussen ʼn boerboel en ʼn labrador, hom beetgekry het.

De Bruin het gesê Dian, sy sussies Diniqke (9) en Dominique (7) was dié oggend tuis saam met hul huiswerker. Die vrou was besig om wasgoed op te hang toe Dian die hond, Seun, met water natgespuit het. Seun, ʼn gewoonlik liefdevolle en spelerige hond, hou niks hiérvan nie en het Dian gebyt.

Sy sussies en die huiswerker  het saam die hond van Dian weggekry en die vrou het inderhaas by die bure gaan hulp kry, van waar Tjaan binne minute met Dian na die Mediclinic Brits gejaag het. Hiér het Dian ʼn operasie ondergaan om sy wonde skoon te maak en te heg.

Die De Bruins het nie ʼn mediese fonds nie en die egpaar het hul gekombineerde salarisse net so vir die hospitaal gegee om hul kind te help. “Ek het ná die tyd vir hulle [Mediclinic Brits] ʼn baie mooi e-pos gestuur om dankie te sê. Ek was in ʼn toestand en hulle het ons só mooi gehelp.

“Almal, van die ongevallepersoneel tot die dokters, die verpleegpersoneel, die narkotiseur en diegene wat die bloedtoetse gedoen het, het ons dadelik gehelp,” het Dina gesê.

Die wonde genees reeds baie goed.

Volgens haar het die hospitaal boonop nie die volle uitstaande bedrag onmiddellik geëis nie, maar hulle kans gegee om dit te probeer bymekaar maak.

Ná ʼn plasing op Facebook het verskeie mense reeds hul hulp aangebied. “ʼn Vrou het my vangoggend gebel en die volle [uitstaande] hospitaalrekening betaal. Sy het ook ekstra geld inbetaal vir ons huur en elektrisiteit. Ek kon nie ophou huil nadat ek met haar gepraat het nie.”

Die voorval was ook vir Dian se sussies ʼn enorme skok. “Hulle het vir hulle pappa gesê hulle wil nie hê hul boetie moet doodgaan nie. Ons het mooi vir hulle verduidelik hoekom dit gebeur het,” het Dina gesê.

Sy het gesê sy het ook aan hul huiswerker verduidelik dat die voorval nie haar skuld was nie. “Sy het vreeslik gehuil.”

Die egpaar het wél later besluit om Seun van kant te maak. “Baie mense het ons gekritiseer omdat ons dit nie dadelik gedoen het nie. Die hond kon nie praat en sê ‘moenie my natspuit nie’ en Dian is ook net ʼn kind. Dit was nie die hond óf die kind se skuld nie. Hy het nie verstaan hy maak die hond kwaad nie en die hond kon dit nie sê nie,” het Dina gesê.

Sy het gesê ten spyte van die enkele negatiewe opmerkings wat mense oor die voorval gemaak het, het die gesin geweldige steun gekry.

Dian, ʼn aktiewe klein seuntjie, is reeds uit die hospitaal ontslaan en sterk tans tuis aan. Volgens sy ma sukkel hy die afgelope paar dae effens om te slaap, maar sy wonde herstel uitstekend. Hy kry ook behandeling by ʼn velspesialis om die merke te verminder.

Dian ondergaan steeds behandeling by ‘n velspesialis.

“Sy gesiggie lyk reeds ʼn honderd keer beter en hy kla nie regtig meer van die pyn nie.”

Die meeste van die steke om die wonde te heg is aan die binnekant van sy gesiggie en Dina sê met volgehoue behandeling gaan daar waarskynlik net ʼn paar ligte merkies oorbly.

Sy het gesê die gesin is uiters dankbaar teenoor almal wat hulle in dié tyd ondersteun het, sowel as diegene wat hulle finansieel gehelp het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

77 Kommentare

jongste oudste gewildste
Agter die skerms

Amen Amen Amen vir mense wat nog omgee. Amen vir die dame wat die hospitaal rekening betaal het Amen God seen jou. En God seen die res wat almal bewys dat daar nog omgee in ons land is.

Annelise

Dankie vir die deel van die mensdom se goeie harte – dit is nog daar!!

Lizelda

Ek is regtig jammer vir dit wat gebeur het, maar ek is regtig bly dat die ouers nie al die blaam op die hond sit nie. Sterkte.

JH

Goeie genade…. Dankie Here! En dankie vir die barmhartige samaritaan vrou… Sterkte aan die klein seuntjie en sy ouers en sommer van my kant af dankie vir die sussies en die huiswerker en die buurvrou se vinnige optrede. In my oë is julle almal helde. xxx

Chris

Met al die depressiewe politieke probleme bly dit n riem onder die hart om te sien ons mense gee nog om dra mekaar se laste