Mense moet nou sê oor nuwe Covid-19-regulasies

Sosiale afstand word in ʼn ry buite ʼn toetsingskliniek in Khayelitsha, Kaapstad gehandhaaf (2 April 2020). (Foto: AP Photo/Nardus Engelbrecht)

Lede van die publiek het nou die geleentheid om hul sê te sê oor die jongste Covid-19-regulasies wat die departement van gesondheid Woensdag voorgestel het.

Dit handel oor die voorgestelde regulasies vir die bestuur van die huidige Covid-19-pandemie – en enige ander pandemie wat dalk in die toekoms kan uitbreek.

Dr. Nkosazana Dlamini-Zuma, minister van samewerkende regering en tradisionele sake, het vroeër vandeesweek te midde van skerp kritiek daarteen, die nasionale ramptoestand opnuut verleng.

“Hierdie is deel van die regering se oorgangsplanne uit die huidige ramptoestand wat nou al meer as twee jaar in plek is,” sê Foster Mohale, woordvoerder van die departement van gesondheid.

Die ramptoestand is vir die eerste keer in Maart 2020 aangekondig in ʼn poging om die verspreiding van Covid-19 in Suid-Afrika te beperk.

Die jongste voorgestelde regulasies poog nou om ʼn aantal nuwe beheermaatreëls in te stel. Van hierdie maatreëls sluit die toesig en beheer van aanmeldbare mediese toestande in, openbaregesondheidsmaatreëls by toegangspunte, die bestuur van menslike oorskot en regulasies met betrekking tot omgewingsgesondheid.

Luidens die voorgestelde regulasies oor hawens, stel die departement voor dat enigiemand wat Suid-Afrika tydens ʼn pandemie wil binnekom of verlaat, ʼn negatiewe PCR-toetsuitslag, wat nie ouer as 72 uur is nie, moet indien as hulle nie ʼn volledige inentingsertifikaat het nie.

“Hierdie regulasie sal dus die huidige een vervang wat ʼn negatiewe PCR-toetsresultaat vereis of toeriste nou ʼn inentingsertifikaat het, al dan nie,” sê Mohale.

In ʼn poging om grootskaalse oordrag tydens byeenkomste te bestuur, stel die jongste regulasies voor dat nagwake en byeenkomste ná begrafnisse beperk word.

Binne- en buitenshuise byeenkomste sal tot 50% van die venuekapasiteit beperk word, mits geldige entstofsertifikate verskaf word, sosiale afstand van minstens een meter gehandhaaf word en die dra van maskers verplig word.

Die bywoning van binnenshuise byeenkomste sonder ʼn bewys van inenting sal beperk word tot slegs ʼn duisend mense en 2 000 vir buiteluggeleenthede. ʼn Sosiale afstand en die dra van maskers word steeds verplig.

“Alle belanghebbendes kan hul kommentaar of vertoë oor die voorgestelde regulasies binne 30 dae vandat dit gepubliseer is, indien.”

Die proses sal teen Vrydag 15 April sluit om die regering die nodige tyd te gee om al die kommentaar te oorweeg.

  • Kry die voorgestelde regulasies hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

18 Kommentare

Nicky ·

Gaan nie help, hullle gaan nog steeds maak wat hulle wil, hulle sal nooit die publiek se vertoe goedkeur nie.

NOBODY ·

so! Gevolglik sal die ramptoestand outomaties verleng na 15 Mei?

Racheltjie Debeer ·

Waar moet mense hul besware indien? Is daar ‘n webtuiste daarvoor?

VaalDonkie ·

Ek het by DearSA aangesluit. Hulle het gewoonlik petisies wat jy kan invul en dan word dit aangestuur. Daar behoort nog maniere te wees.

Anel ·

So, verstaan ek reg, ons sal aan hierdie regulasies moet voldoen tot die oordeelsdag?

Pippie ·

Is daar net een JA op die volgende 12 vrae?
Sal die entstowwe voorkom dat ek Covid 19 opdoen?
Sal entstowwe voorkom dat ek ander aansteek indien ek Covid 19 opdoen?
Sal entstowwe help om kudde immuniteit te bereik?
Is Covid 19 entstowwe gewaarborg om nie natuurlike immuniteit aan te tas nie?
Is Covid 19 entstowwe gewaarborg om nie siektes soos hartsiektes, kanker, senustelsel toestande ens te veroorsaak nie?
Is daar ongesensorde kliniese toetsinligting vrylik beskikbaar oor Covid 19 entstowwe?
Is Covid 19 entstowwe duidelik ge-etiketeer?
Is Covid 19 entstowwe finaal goedgekeur?
Kan farmaseutiese maatskappye aanspreeklik gehou word vir enige skade wat deur hulle Covid 19 entstowwe veroorsaak word?
Sal die regering verantwoordelikheid aanvaar vir entstof newe effekte?
Respekteer Covid 19 entingsmandate die 10 standaarde soos deur die Nuremberg Kode van 1947 bepaal word?
Is dit werklik wettig om Covid 19 entmandate af te dwing?

Johanncb ·

Die sluitingsdatum is 15 April, wat beteken dat Me Zuma die voorgestelde reëls gaan implimenteer, of ons daarvan hou of nie! Wat ‘n jammerhartige toestand van sake! Magspel se Moses!

Vlooitjie ·

Die artikel lees: “Alle belanghebbendes kan hul kommentaar of vertoë oor die voorgestelde regulasies binne 30 dae vandat dit gepubliseer is, indien.” Maar waar en hoe mens dit kan doen word nie bekend gemaak nie. Hoe dan nou?

Manie ·

Dit beteken die ramptoestand kan voor 15 April weer verleng word, want die data gaan nie voor dit ingewin en verwerk word nie, asof hulle enigsins omgee oor wat die publiek dink.

Mariette ·

Skrap net alles en kry klaar! Die regering oorskry lankal hulle magte.

Hennie ·

Maar as ons vlieg dan staan ons lekker naby aan mekaar, dit terwyl die lugversorgers nie werk in die drukgange nie. ACSA aka ANC probeer krag spaar, te hel met Covid!

Marina ·

Ag asb, die regering sal nie eers na die voorstelle/kommentaar kyk nie. Ons is mos nou pionne en lyk my dit gaan so bly

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.