Mense moet trots wees op myne in gemeenskappe, sê Mantashe

Gwede Mantashe (Foto: Courtney Africa/African News Agency/ANA)

Gwede Mantashe, minister van minerale hulpbronne, het Maandag gesê die mynboubedryf moet begin seker maak dat gemeenskappe die voordele besef van mynbou en dat hulle trots sal wees op myne in hul omgewing.

“Ons moet seker maak dat gemeenskappe die voordele van mynbou besef. Mynbou moet nie uit ʼn negatiewe oogpunt beskou word nie. Dit moenie gesien word as iets wat die omgewing verwoes, die omgewing of water besoedel nie; dit moet beskou word as ʼn voordeel vir die gemeenskappe en mense moet trots wees op die myne. Dit is die volgende kwessie wat die mynmaatskappye moet aanroer,” het hy Maandag tydens die 25ste jaarlikse Belê in Afrika Mynbou-indaba by die Kaapstadse konvensiesentrum gesê.

Die vier dag lange geleentheid vier 25 jaar se vordering in mynbou in Afrika en fokus op sakeverhoudinge in die mynboubedryf oor kontinente heen.

Mantashe het gesê mynbou bestaan nie in ʼn vakuum nie en meganismes moet ontwikkel word om seker te maak dat die mynboubedryf met ander ekonomiese sektore saamwerk en ook die gemeenskappe waar die myne bedryf word. “Dit is baie belangrik vir die langtermynvolhoubaarheid van die bedryf. Daar moet betekenisvolle en voldoende gesprekke met gemeenskappe wees wat betref die uitreik van prospekteerpermitte, mynbouregte en permitte om regte te bepaal, die impak en voordele vir die gemeenskap.”

Mantashe het vroeër gesê een van die uitdagings in die mynboubedryf is die kwessie van onwettige mynboubedrywighede wat die ekonomie ʼn groot knou gee. “Dit het verlede jaar Desember aan die lig gekom dat $14 miljard goud in Suid-Afrika onwettig gemyn is. Dit is baie geld. Dit is ons verantwoordelikheid om dit te probeer reguleer. Lisensies moet uitgereik word en kleinskaalse mynboubedrywighede moet as deel van die bedryf beskou word. Ek dink ons kan baie leer by ander lande op die kontinent.”

Die ouditeursfirma Deloitte het Maandag Mantashe se kommentaar verwelkom. Andrew Lane, Deloitte se leier van Afrika-energie en -hulpbronne, het gesê sy toespraak was vanjaar baie meer positief as die vorige jaar. “Ons verwelkom dat hy klem gelê het op belegging in mynbou en om beleggings na die kontinent te lok. Minister Mantashe het ook die belangrikheid van mynboumaatskappye se winsgewendheid beklemtoon. Dit is ʼn baie goeie erkenning van die regering. Slegs deur winsgewende mynboubedrywighede kan die gemeenskappe voordeel trek.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Vonkprop

Maar myne verwoes die omgewing en besoedel die water jy kan dit nie ignoreer nie. En soos hulle lisensies links en regs toeken raak dit ‘n negatiewe ding. Hierdie stelling is net gemaak om meer myne goed te praat en meer skade aan te rig sonder goeie beplanning.

Gemaskerde Sopbeen

En gaan kyk bietjie na die “informele” myn bedrywighede by Durban Deep in Roodepoort….Sommer so oop en bloot….reg langs die skietbaan….

Oom Kalahari

Mnr Mantashe, asb trots op wat? Maak asb jou oe oop en kyk na die impak op mens, dier en natuur deur ongewenste en ongekwalifiseerde opgrawings en hanterings.

Phillip Groen

mmm….. Verskoon my Gwede maar dis die ANC en sy meelopers wat links regs en senter onenigheid tussen besigheid en die werker/gemeenskap saai! Julle beskou besigheid as die vyand weens jul erge kommunistiese/sosialistiese gedagtegange. MAAR terselftertyd wil julle hê dat die “varke”in julle feëverhaal werksgeleenthede moet skep want vir al julle se ge-huff-en-puff weet julle dat regerings nie volhoubare werk kan skep nie, en omdat julle hul belastings broodnodig het om julle gekke welsynstaat te proeer maak werk. Julle probeer die reisies jaag deur op twee perde terselftertyd te probeer ry….logika wil dit hê dat julle in die stof op… Lees meer »

Johann

Ja shure ANC. Sidder om te dink hoeveel julle al vir julle eie gewin “gemyn” het.