Mercedes Benz sê jammer ná ‘omstrede’ Moedersdag-video

Argieffoto

Die motorvervaardiger Mercedes Benz het verskoning gevra vir ʼn Moedersdag-advertensie wat vurige reaksie op sosiale media ontlok het weens “die gebrek aan diversiteit” in die video.

Die advertensie, wat “internasionaal” vervaardig is, is daarop gemik om aan ma’s “dankie te sê vir die liefde en energie wat hul elke dag in” ander se lewens inbring.

Die video speel met die idee van verskillende soorte ma’s, onder meer besigheidsma’s, sokkerma’s, gimnasium-ma’s en mode-ma’s, en hoe elkeen van dié ma’s dieselfde blywende impak in hul kinders en ander se lewe laat.

Al die rolle van die verskillende ma’s word deur ʼn onbekende wit aktrise vertolk.

Talle sosialemediagebruikers het die motorvervaardiger daarvan beskuldig dat hy nie divers is nie – veral nie binne ʼn Suid-Afrikaanse konteks nie.

“As Suid-Afrika enigsins tot Mercedes Benz se winste bydra, sal dit waarskynlik wys wees vir hulle om advertensies te vervaardig wat die grootste groep in Suid-Afrika verteenwoordig,” het Iman Mkwanazi laat hoor.

“Mercedes moes om verskoning vra vir dié advertensie omdat hulle van net een ras gebruik gemaak het in die video en nie die Suid-Afrikaanse demografie verteenwoordig het nie,” het Matt Maekela geskryf.

Honderde sosialemediagebruikers het egter teruggekap en gesê daar is niks fout met die advertensie nie aangesien dit internasionaal vervaardig is en daar deur die loop van die advertensie net een aktrise gebruik is. “Daar is werklik niks verkeerd met daardie Mercedes-advertensie nie,” het Thando Duma gesê. “Kan iemand asseblief vir my verduidelik waaroor al die bohaai gaan?” het Nonhle  Shandu gesê. “As hulle verskillende modelle gebruik het sou ek dalk verstaan het. Lig my asseblief in.”

“Ek sien nie ʼn enkele fout in die Mercedes-advertensie nie,” het nog ʼn gebruiker (@zuksterr) laat hoor.

Die motorvervaardiger het hom egter steeds tot sosiale media gewend om verskoning te vra en die video van sy platforms verwyder.

“Hierdie video, wat internasionaal vervaardig is, was bedoel om ons ondersteuning vir Moedersdag te wys. Ons het die diversiteit van ons volgelinge in Suid-Afrika onderverteenwoordig deur die gebruik van ʼn enkele karakter. Ons vra om verskoning dat ons ons Suid-Afrikaanse kliënte aanstoot gegee het.”

Kyk hier na die video.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

87 Kommentare

jongste oudste gewildste
Ania

Ag tog. Het ons nou nodig om sulke nonsens op ‘n Maandagoggend te moet lees? Die storie is al so vervelig.

Martin

Kom by SA, dit is n buitelandse advertensie en hoofsaaklik daarvoor bedoel, julle is beheb met jul rassisme.

Liza

Ai jai….. Daar is werklik ander erger sake waaroor gekla kan word as n eenvoudige verdomde advertensie .

OL

Beste van als is dat dit 1 vrou is wat gebruik word vir die verskillende tipe ma’s! As daar verskillende vroue gebruik was om elke tipe ma te verteenwoordig…. By all means, gooi dan jou poope uit die pram!

Basson

SA : ‘n Toekomsvenster oor hoe die wereld oor 50j daarna gaan uitsien.

Mens vra net verskoning as mens skuldig is aan iets – MB is nie skuldig , dis jammer hulle het gevou onder die druk van ‘n paar.