Metrobeampte skuldig aan moord

Argieffoto

Argieffoto

ʼn Tshwane-metropolisiebeampte is Woensdag in die hooggeregshof in Pretoria daaraan skuldig bevind dat hy sy vriendin verwurg en haar liggaam aan die brand gesteek het.

Regter Mmonoa Teffo het Lloyd Morutse Maleswena (29) se bewering dat sy vriendin, Claudia Rapudi, se dood ʼn “ongeluk” was, verwerp en gesê hy het die bedoeling gehad om haar dood te maak.

Maleswena en Rapudi was albei metropolisiebeamptes en het saam gewerk. Haar verkoolde lyk is in November 2011 in die kattebak van haar motor gevind in ʼn veld in Cullinan, oos van Pretoria. Die polisie moes DNS-toetse doen om haar identiteit te bevestig.

Rapudi se motor is die laaste keer by Maleswena se huis in Lotus Gardens gesien, ure voor haar liggaam gevind is. Maleswena is in hegtenis geneem nadat hy aan ʼn priester bely het oor die moord.

Maleswena het erken dat hy Rapudi na ʼn argument gewurg het. Hy het haar daarvan beskuldig dat sy ʼn verhouding met ʼn ander man gehad het. Sy het dit ontken. Hy het in ʼn verklaring gesê dat hy Rapudi gewurg het tot sy haar bewussyn verloor het. Hy het haar hierna in die huis toegesluit en werk toe gegaan. Hy het later teruggekeer en Rapudi se liggaam in haar motor se kattebak gesit. Hy het tot by ʼn afgeleë plek gery waar hy die motor aan die brand gesteek het.

ʼn Patoloog het getuig dat Rapudi dood is nadat sy derdegraadse brandwonde aan haar liggaam opgedoen het. Maleswena se regsverteenwoordiger het aangevoer dat sy kliënt berou getoon het en nie langer as 12 jaar tronkstraf moet kry nie. Die staat het gevra vir ʼn vonnis van langer as 15 jaar tronkstraf.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

ladybug ·

Vermoor iemand en gaan dan sommer dood luiters werk toe asof niks gebeur het nie? Hierdie ou is siek in sy kop! Gee hom lewenslank, nog beter, hang hom!

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.