Die liggaam van ʼn metropolisiebeampte is vanoggend met ʼn enkele skietwond aan die kop in sy voertuig digby die ou lughawe op die N2 in Durban gekry.
Kol. Thembeka Mbele, polisiewoordvoerder, het gesê die metrobeampte was nie aan diens nie.
ʼn Geregtelike doodsondersoek word na die voorval gedoen.
Dit was ʼn dodelike week vir polisiebeamptes.
Maroela Media het vroeër berig lt.kol. Leroy Bruwer (49), ʼn speurder van die Valke, is Dinsdag vermoor in wat moontlik ʼn sluipmoordaanval kon wees.
Bruwer, ʼn gesoute speurder, is in sy motor buite Mbombela (Nelspruit) met ʼn aanvalsgeweer doodgeskiet.
In nog ʼn voorval is Thinandavha Stanley Mudau (52), ʼn polisielid verbonde aan die polisie se eenheid vir gesinsgeweld, kinderbeskerming en seksuele misdrywe in Thohoyandou, Sondag wreedaardig met ʼn panga doodgekap. Hy wou ʼn verdagte ondervra toe dié hom glo aangeval het.
En in nog ʼn voorval het ʼn taxibestuurder ʼn Kaapstadse verkeersbeampte in Kensington doodgeskiet. Die beampte het die taxibestuurder vir ʼn verkeersoortreding in hegtenis geneem. Die bestuurder het die beampte op pad polisiestasie toe oorrompel en doodgeskiet.
Ag nee man, so onnodig, baie sterkte vir al die mense wat hulle liefgehad het wat agterbly, dis helde wat gesterwe het.