Min oor van toerismeontwikkeling by Boschberg

Só lyk die Boschberg-toerismeknooppunt nou. (Foto: DA/Facebook)

Daar is bitter min oor van die staat se toerismeknooppunt van R11,7 miljard by Boschberg in die Oos-Kaap.

Boschberg wat eens as die “berg van drome” beskryf kon word, is eerder nou die “berg van nagmerries”, meen Vicky Knoetze, die DA se woordvoerder oor samewerkende regering in die Oos-Kaap.

Die opposisieparty het nou ’n skrywe aan Xolile Nqatha, LUR van samewerkende regering, gerig waarin daar versoek word dat die omstandighede wat gelei het tot die totale vernietiging van dié knooppunt ondersoek word.

Die DA blameer die ANC vir die toerismeknooppunt se agteruitgang en beveel in die skrywe aan dat die eiendom geprivatiseer word sodat dit opgeknap kan word en kan terugkeer na sy aanvanklike doelstelling – bevordering van die plaaslike ekonomie.

Só lyk die Boschberg-toerismeknooppunt nou. (Foto: DA/Facebook)

Die Boschberg-toerismeknooppunt, wat in die omgewing van Somerset-Oos geleë is, is in 2015 voltooi nadat dit destyds geïdentifiseer as ʼn belangrike ontwikkelingsprojek vir die Blue Crane Development Agency wat sedertdien ontbind is.

“’n Bekwame staat sou eers ’n beoordeling gedoen het voordat hy miljoene rande se swaarverdiende belastingbetalersgeld weggegooi het, óf ten minste verseker het dat die regering se befondsde infrastruktuur beskerm word teen vandalisme en plundering,” sê Knoetze in ’n verklaring.

Volgens Knoetze was die ANC destyds vinnig om te spog oor hoe die streek die gemeenskap uit armoede sou lig. “Die ANC-regering het egter geen verantwoordelikheid aanvaar vir hierdie mislukte projek wat nooit tot voordeel van die inwoners van Somerset-Oos was nie.”

Die knooppunt het ten doel gehad om ’n basis vir talle toerismeprodukte te wees, gegrond op aktiwiteite, avontuurtoerisme, ekotoerisme asook kulturele en landboutoerisme. Die toerismeknooppunt moes 95 permanente werkgeleenthede skep.

“In plaas daarvan het dit geen waarde, werkgeleenthede of [positiewe] ekonomiese gevolge vir die gemeenskap meegebring nie,” sê Knoetze.

Knoetze versoek dat die LUR haar vergesel op ʼn besoek aan die knooppunt sodat sy die erns van probleem kan uitwys.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

5 Kommentare

jongste oudste gewildste
Dries

Soos iemand op radio gestel het, ANC = rampokker bende.

Suzette

Nog een van VELE “suksesse” van die huidige regering.

Johanncb

Somerset-Oos is nie die plek vanwaar toerisme bevorder moet word nie. Cradock is baie beter geleë! Die Regering gaan in die toekoms nog baie sulke “foute” maak!

Ben

R123 m per werker. ?????????