Minister reageer op oproepe om doodstraf

Foto: Pixabay

Die oproepe vir die herinstelling van die doodstraf is op baie maniere gebrekkig.

Só het Ronald Lamola, minister van justisie en korrektiewe dienste, gesê in reaksie op hernieude oproepe dat die doodstraf ingestel word na ʼn vlaag aanvalle en moorde in Suid-Afrika op veral vroue en kinders.

ʼn Aanlyn versoekskrif waarin gevra word dat die doodstraf teruggebring word, het Donderdagoggend reeds meer as 560 000 handtekeninge gehad. Die versoekskrif is vroeër die week op die webtuiste change.org begin.

Lamola is Woensdag tydens ʼn mediakonferensie gevra of die kabinet ʼn gesprek of referendum sal oorweeg rakende die oproepe dat die doodstraf teruggebring moet word. Hy het gesê indien die kwessie na die kabinet verwys word, sal hulle waarskynlik daaroor moet praat.

Volgens Lamola se departement het hulle agtergekom dat die minister se aanmerkings in ʼn ander lig gesien is.

“Dit is belangrik vir ons burgers om daarop te let dat die Handves van Regte voorsiening maak vir ’n tapisserie van menseregte wat almal in Suid-Afrika geregtig is om te geniet onder beskerming van die reg. Die Grondwet is ʼn verpersoonliking van die waardes van ons nuwe samelewing wat poog om die ongeregtighede van die verlede uit te roei, ons teen ons eie grille te beskerm, die oppergesag van die reg te bevorder en om gelykheid voor die wet te waarborg.”

Lamola het daarop gewys dat almal ingevolge artikel 11 van die Grondwet die reg op lewe het. Die doodstraf is in 1995 in Suid-Afrika afgeskaf.

“Die verwerping van die doodstraf deur die skeppers van ons Grondwet is nie net beperk tot die feit dat dit in die verlede gebruik is om geregtelike moorde teen vryheidsvegters en teenstanders van die apartheidstelsel uit te voer nie. Dit was ook gegrond op goed gedokumenteerde navorsing dat die doodstraf nie as ’n afskrikmiddel vir die pleeg van misdaad in enige samelewing oor die hele wêreld gedien het nie.”

Die idee dat die doodstraf as ʼn afskrikmiddel dien vir gewelddadige misdaad is nie waar nie en daar is bewyse om dit te staaf, aldus Lamola.

“In die VSA is die moordsyfer in deelstate wat nie doodstraf het nie, konstant laer as die persentasie in deelstate waar die doodstraf steeds toegepas word. Dit weerklink met bewyse waar geweldsmisdade in ander lande wat nie die doodstraf het nie, verminder het na die afskaffing van die doodstraf. Die hele Europa het die doodstraf afgeskaf, nie omdat hul misdaadsyfers destyds laag was nie, maar ter erkenning van die feit dat staatsbeheerde geweld deel uitmaak van die prosesse wat die samelewing brutaal gemaak en tot die kultuur van geweld gelei het.”

Minister Ronald Lamola. Foto: Parlement/Twitter

Volgens Lamola is dieselfde waar vir Suid-Afrika. “Ons kom van ʼn moeilike verlede en die brutale gebeure van die afgelope paar dae vertroebel die vordering wat ons gemaak het. In 1994/’95 was die moordsyfer 67 per 100 000. Teen 2014/’15 het dit na 33 per 100 000 geval. Dit is ʼn afname van 51% in 20 jaar. Dit is steeds te hoog maar dit bewys duidelik dat die doodstraf nie ʼn bepalende faktor is om die moordsyfer af te bring nie. Die moordsyfer het aansienlik afgeneem sedert die doodstraf afgeskaf is.”

Volgens Lamola is een van die oplossings om toe te sien dat die hele waardeketting van die strafregstelsel verbeter – van ondersoek, inhegtenisneming, deur doeltreffende vervolging tot gevangenisstraf, rehabilitasie en herintegrasie in die samelewing.

“Soos sake tans staan, word slegs 10% van diegene wat moord pleeg, gevang en skuldig bevind. Uit ’n strafregstelselperspektief moet laasgenoemde statistieke verander. Ek wil dit durf om te sê dat ’n populistiese benadering met vinnige regstellings die situasie waarskynlik op lang termyn sal vererger.”

Die Handves van Regte kan volgens Lamola ook nie aan ʼn referendum onderwerp word nie. “Die grondslag van die grondwetlike bestel wat ons bou, is gegrond op die noodsaaklikheid om almal wat nie noodwendig voldoende beskerm word nie, te beskerm deur ’n demokratiese proses waar blote getalle die omvang van die beskerming sal bepaal.”

Artikel 74(1) van die Grondwet maak voorsiening dat die stigtingsbepalings in artikel 1 van die Grondwet net gewysig kan word deur ʼn wet wat deur die Nasionale Vergadering goedgekeur is met 75% van die lede wat ten gunste daarvan is en ʼn ondersteunende stem van minstens ses provinsies in die Nasionale Raad van Provinsies.

“Laastens sal die herinstelling van die doodstraf nie geweld teen vroue en kinders oplos nie. Daar is ’n heersende ideologiese denkwyse – dié van manlike oppergesag en geregtigheid wat aanleiding gee tot geweld teen vroue en dit onderhou. Ons moet hierdie ideologiese moeras dreineer.”

Volgens Lamola is daar geen maklike oplossing nie en moet daar in die voorkoming van geslagsgebaseerde geweld ingekoop word.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

96 Kommentare

jongste oudste gewildste
Michael P

Van watter planeet kom die ou vandan?

Arie

Hulle is heeltemal mal, kom net oor julle probleem!! Die ou SA was in elk geval baie veiliger!!!!

Chris

In kort gestel die regering beskerm die misdadigers. As jy ‘n verkragter en/of moordenaar is verdien jy geen ‘mensereg’ nie, want jy het iemand anders se reg om te lewe vernietig.

charmaine

Hulle gee net verskonnings want hulle weet die meeste gaan van hulle eie mense wees wat die doodstraf kry. Dit sal help om bietjie die tronke skoon te kry. Jy het nie die galg nodig nie, net n inspuiting want dit gaan erger word daar is geen dissipline of respek meer in hierdie land.

Wielspore

Mnr die minister, as jy nie jou pligte nakom gaan iemand anders dit namens jou doen.
Doodstraf vir SA gaan heelwat van ons misdaad probleme oplos.