Minister sê jammer na POF betalings staak

Dipuo Peters, minister van vervoer. Foto: Elmond Jiyane, GCIS

Dipuo Peters, minister van vervoer. Foto: Elmond Jiyane, GCIS

Dipuo Peters, minister van vervoer, het om verskoning gevra nadat die Padongelukkefonds (POF) die betaling van eise gestaak het nadat die balju op sy bankrekening beslag gelê het.

Peters het in ʼn verklaring gesê die balju se beslaglegging op die POF-rekening is betreurenswaardig, omdat eisers nou nie meer toegang het tot broodnodige finansiële verligting van die regering nie. Sy het gesê sy het die POF opdrag gegee om almal wat deur die saak geraak word, op hoogte te hou van die stand van sake en te verseker dat die situasie dringend na normaal terugkeer.

Eugene Watson, die POF se uitvoerende hoof, het Vrydag gesê alle uitbetalings is gestaak nadat die balju op die fonds se bankrekening beslag gelê het weens uitstaande betalings. “Dit is die gevolg van ʼn paar prokureursfirmas, wie se optrede nou ʼn gevestigde kontantbetalingsplan [van die POF] ontwrig en wat nou onnadenkend geprioritiseer word bo ander wat geduldig vir hul betalings gewag het,” het hy gesê.

Volgens Watson het die beslaglegging ʼn baie negatiewe uitwerking op die instansie se bedrywighede gehad en sy pogings om al sy verpligtinge na te kom, ondanks onvoldoende befondsing, ontwrig.

“Ons vra om verskoning vir die ongerief. Alles moontlik word gedoen om die saak vinnig op te los sodat die POF uitbetalings kan hervat.

“Die onmiddellike staking van betalings, voortdurende kontantvloeiprobleme en die reuse, ongegronde aanspreeklikheid wat die minister van finansies in die mediumtermyn-begrotingsrede geopper het, is deurlopende bewyse dat die POF-bedeling duur, onbekostigbaar en onvolhoubaar is. Dringende verandering is nodig,” het Watson gesê.

Verskeie prokureursfirmas het glo die POF vir R11 miljoen gedagvaar.

Die departement het gesê terwyl die regering beplan het om die Padongeluk-voordeleskema (Rabs) te implementeer, het die POF ʼn kontantbestuurplan twee jaar gelede ingebring om volgehoue betalings te verseker.

“Die huidige skema wat deur die POF geadministreer word, is oop vir bedrog, opportunistiese en oordrewe eise en menslike foute. Dit is een van die vele redes hoekom die regering die Rabs, ʼn foutlose skema, ingebring het, wat ʼn nuwe era van sosio-ekonomiese balans sal skep en die onbedoelde negatiewe gevolge en finansiële las op die families van die oortreder sal verwyder,” het die departement gesê.

Volgens die Rabs sal daar nie gekyk word na die fout van die eiser of ander mense wat by die ongeluk betrokke was nie. Die fokus sal in wese wees op hoe die eiser onmiddellik bygestaan kan word.

Betalings sal direk aan die eisers, mediese en gesondheidsdiensverskaffers gemaak word. Die Rabs sal deur die brandstofheffing befonds word en voordele vir mediese uitgawes, inkomste-ondersteuning, familie-ondersteuning en begrafnisvoordele insluit.

Eisers sal direk by die skema kan eis, terwyl die skema se administrateur eise sal evalueer op grond van voordele en die begunstigdes volgens die wet betaal. Die verwydering van die bewyslas en die voorskaffing van gedefinieerde voordele beperk die ruimte vir geskille en die gepaardgaande regskostes, het die departement gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Johanna Botha

Nou is dit seket die balju se skuld …jimmel die mense kan mens net woedemd maak …dis een na die ander wiel wat afkom met die useless anc mense

Jaco

Minister is nikswerd. Sy moet dadelik bedank!

Maklik

Maklik, laai net die brandstof met x-sent/liter.

Jannie

My eis is nou al 6jr uitstaande. Wonder wanneer gaan hulle my betaal.

wilma

Foutlose skema. Die Minister droom. Wat kan SA Regering aanpak wat foutloos is. Sy laat my lag. Buitendien dink sy en number one verskoning vra sal sake regstel. Hahaha. LOL. Wat n grap?