Ministers, adjunkte as ‘distrikskampvegters’ ontplooi

Nkosazana Dlamini-Zuma, die minister van samewerkende regering en tradisionele sake (Foto: National Cogta/Twitter)

Die DA sê die ANC is inderdaad besig om ministers en adjunkministers na plaaslike en provinsiale regerings te ontplooi as deel van die bevelsraadstelsel.

Cilliers Brink, die DA se woordvoerder oor samewerkende regering en tradisionele sake, het gesê briewe is reeds aan premiers en burgemeesters gestuur waarin hulle ingelig word oor wie hulle sogenaamde distrikskampvegters is. Daar word na dié kampvegters verwys in ʼn dokument van die departement wat as “hoogs geheim” geklassifiseer is.

Die betrokke dokument beskryf die Covid-19-pandemie as die ideale geleentheid om die regering se mag te sentraliseer en hou die regering se “distriksontwikkelingsplan” voor as die manier om dit te bereik.

Die DA het weereens sy kommer uitgespreek dat die dokument moontlik die begin van ANC-pogings is om die magte van plaaslike en provinsiale regerings in te perk.

Cilliers sê die DA het pres. Cyril Ramaphosa reeds oor die dokument uitgevra en wag op sy antwoord.

“Intussen spesifiseer die ontplooiingsbriewe nie watter magte en verantwoordelikhede die distrikskampvegters gaan hê nie.

“Die DA glo sommige munisipaliteite het die uitnodiging om hul aangewese distrikskampvegters te aanvaar van die hand gewys tot die president meer duidelikheid daaroor gee.”

Cilliers sê dit is belangrik dat alle vlakke van die regering saamwerk om die Covid-19-pandemie te verslaan, maar dat dit begin met ministers wat dít doen waarvoor hulle in die eerste plek aangestel is.

Hy sê ministers soos Bheki Cele, minister van polisie, Lindiwe Zulu, minister van maatskaplike ontwikkeling, en Ebrahim Patel, minister van handel en nywerheid, was tot dusver in die middelpunt daarvan om pogings te ondermyn om die pandemie te beveg.

“Selfs die departement van samewerkende regering was uitsonderlik onhulpvaardig. Maande nadat pres. Cyril Ramaphosa miljarde rande in hulp beloof het aan munisipaliteite wat deur die afsondering geruk is, is dit steeds onduidelik of en wanneer munisipaliteite dié hulp gaan kry.”

Cilliers sê in plekke soos die Govan Mbeki- plaaslike munisipaliteit, waar die Bethal‑Emzinoni-gemeenskap sedert die afsonderingstyd onder beurtkrag van tot 12 uur lank gebuk gaan, het die nasionale regering nog nie ʼn vinger verroer om in te gryp nie.

“Bykomend tot duidelikheid oor die sogenaamde hoogs geheime dokument, gaan die DA nou ook die president vra om die land in sy vertroue te neem oor waarheen sy ministers en adjunkministers in hul rol as distrikskampvegters stuur.”

Cilliers sê die vraag moet gevra word of die land nie in ʼn beter posisie sal wees as Ramaphosa beter oorsig oor sy ministers uitoefen eerder as om hulle te ontplooi om toesig oor burgemeesters en premiers te hou nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Pampoen

Hulle is maklik uitkenbaar. Die dames dra kopdoeke en die mans hoede.

Fedup

Total control.

Kokerboom

Die situasie rondom regering moet fyn gemonitor word. Die ANC moet sy 26 jaar van gemors regverdig teenoor sy kiesers en sal nou enige onderduimse kat en muis speletjies en strategiee uitdink om mag te behou ten koste van land en sy inwoners

JohanF

Wat op regerings vlak aangaan, en op grondvlak, is so wyd verspreid…… Hoeveel kennis het hulle regtig oor die fisiese uitvoer van sekere besluite, opdragte…..

Barbara

Al wat ons kan vra is dat die DA die situasie moet fyn dophou asb.