Minstens 18 vas ná chaos in Pretoriase middestad

Brandbestryders het vanmiddag nog brande geblus. (Foto: Gov/Twitter)

Minstens 18 mense is in hegtenis geneem nadat chaos in die middestad van Pretoria uitgebreek het.

Sowat 3 000 mense is vanmiddag uitmekaar gejaag nadat Lilian Ngoyistraat vanoggend versper en buitelanders se winkels tussen Struben- en Bloedstraat geplunder en aan die brand gesteek is.

Kapt. Augustinah Selepe, woordvoerder van die polisie, het gesê die situasie is sedertdien in bedwang gebring en die polisie en brandweer is tans op die toneel om die brande te blus.

Maroela Media het vroeër berig die geweld het reeds Dinsdag uitgebreek en hou glo verband met spanning tussen minibustaxibestuurders en dwelmbase. Dit volg nadat ʼn taxibestuurder Dinsdagmiddag in die middestad doodgeskiet is in ʼn bakleiery met vermeende dwelmbase.

Stevens Mokgalapa, burgemeester van Tshwane, het in ʼn verklaring die taxibestuurder as Jabu Balo (45) geïdentifiseer en sy medelye met Balo se naasbestaandes betoon.

(Foto: Yusuf Abramjee/Twitter) 

Mokgalapa het ook vir kalmte gevra aangesien pendelaars vandag gestrand gelaat is nadat alle munisipale openbare vervoer in die gebied weens die geweld gestaak is.

Jacob Mamabolo, ​LUR vir openbare vervoer en padinfrastruktuurin Gauteng, en die Gautengse polisiehoof, lt.genl. Elia Mawela, het vanmiddag met leiers van onderskeie taxiverenigings vergader in verband met die moord op Balo, wie se vermeende moordenaars steeds soek is.

Die DA het op sy beurt die afgelope paar dae se geweld veroordeel en dit as xenofobie bestempel.

“Almal het die reg om hul ontevredenheid deur wettige betogings uit te spreek, maar dit gee hulle nie die reg om eiendom te beskadig en winkels te plunder nie,” het John Moodey, partyleier in Gauteng, gesê.