Mooinooi-skietery: Matthew Benson hoor sy lot

Matthew Benson. Foto: Molaole Montsho / ANA

Die hooggeregshof in Pretoria het Maandag uitspraak gelewer in die saak van Matthew Benson (25), wat daarvan beskuldig is dat hy in Augustus 2017 op drie mans op ʼn plaas in die Mooinooi-omgewing in Noordwes geskiet het.

Benson, die seun van ʼn boer in die Mooinooi-omgewing wat sedert sy inhegtenisneming in September in aanhouding was, se verhoor het op 28 Mei begin. Hy het tereggestaan op ʼn aanklag van moord, twee aanklagte van poging tot moord, dwarsboming van die gereg en die besit van ʼn ongelisensieerde vuurwapen en ammunisie. Hy het onskuldig gepleit op al die aanklagte teen hom.

Regter JJ Hattingh het Benson Maandag onskuldig bevind op al die aanklagte teen hom. “Die staat kon nie daarin slaag om bo enige redelike twyfel te bewys dat Benson skuldig is nie. Slegs een van die getuies wat dié dag op die plaas was, kon Benson identifiseer en dié getuie [een van Tebogo Ndlovu se vriende] het sy weergawe van die gebeure by drie geleenthede verander om by die staat se saak te pas,” het Hattingh in sy uitspraak van 33 bladsye gesê.

“Uiteindelik moet die regte persoon in die beskuldigdebank wees vir ʼn misdryf en dit kan nie in dié geval bewys word nie,” het hy gesê.

Benson is daarvan beskuldig dat hy op 2 Augustus skote op Tebogo Ndlovu (24) en twee vriende afgevuur het toe hulle glo op sy pa se plaas skrootmetaal en lemoene wou steel. Ndlovu is glo tydens die voorval in die been geskiet. Sy vriende het hom opgetel en probeer weghardloop met hom, maar glo agtergelaat aangesien hy te swaar was. Hulle het hom onder ʼn boom gelos en na ʼn berg gehardloop. Hy is sedertdien nog nie weer gesien nie. Daar is ook nog nie ʼn liggaam gevind wat by sy beskrywing pas nie.

Lees ook: Matthew Benson: ‘Ek is dankbaar die waarheid is uit’

Lees die vorige berigte oor Matthew Benson op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Sjoe

Sjoe dit was ‘n lang tyd. Ek het darem self gewonder oor die storietjie…… Ek dink regtig die outjie is nie dood nie, dalk nie eens raak geskiet nie, klink net te snaaks.

Piet Snot

Moeilike saak, gegewe die politiek. Die regter het hom egter blind gehou vir die politiek, en op die bewese feite gekonsentreer.
Dis nou ‘n voorbeeld van hoe dit gedoen word.

GM

Sy lewe is nou basies verwoes deur mense wat op die rug van apartheid en rassisme ry. Ek sal graag wil weet wat nou met die getuie gaan gebeur? Word hy aangekla? Ek hoop die wat so skree dat die doodstraf teruggebring moet word nou sal sien hoe maklik onskuldige mense in die tronk sal beland as gevolg van ander se haat en leuens.

marous

Mag hy slaag met eise vir biljoene !

marius

Dit was ‘n kwaadwillige saak teen hom, net soos die Colingny saak. Die sake gaan baie meer begin word veral met die haatspraak wet wat kom.