Moorddossier geopen ná vrou se dood op wynlandgoed

Jason en Susan Rohde. Foto: Facebook

Jason en Susan Rohde. Foto: Facebook

Jason Rohde (47), uitvoerende hoof van Sotheby’s International Realty South Africa, het ontken dat hy sy polisieverklaring teruggetrek het nadat ʼn moorddossier geopen is om sy vrou, Susan (47), se dood te ondersoek.

Susan se liggaam is die oggend van 24 Julie in ʼn hotel op die Spier-wynlandgoed buite Stellenbosch gevind. Volgens mediaberigte het Jason op sy vrou se liggaam afgekom waar sy in die badkamer met die koord van ʼn haartang opgehang was. Kapt. FC van Wyk, woordvoerder van die polisie, het egter slegs bevestig dat haar liggaam in die hotel gevind is.

Volgens Van Wyk is daar aanvanklik ʼn geregtelike doodsondersoek geopen, maar nadat ʼn nadoodse ondersoek gedoen is, is ʼn saak van moord aanhangig gemaak. Van Wyk wou nie kommentaar lewer oor die beserings wat Susan opgedoen het of die oorsaak van haar dood nie.

Daniel Witz, Jason se regsverteenwoordiger, het aan Maroela Media gesê mediaberigte dat Jason sy aanvanklike verklaring aan die polisie teruggetrek het, is onwaar. “Mnr. Rohde is die persoon wat op sy vrou se liggaam afgekom het en is eers later versoek om ʼn verklaring af te lê,” het Witz gesê.

“ʼn Verklaring is nie by die polisie ingehandig nie, omdat al die partye saamgestem het dat dit gepas sal wees om eers te wag dat patologiese of forensiese ondersoeke en toetse gedoen word alvorens die verklaring ingehandig word. In hierdie stadium is daar nog geen verklaring ingedien nie aangesien al die partye nog wag op die uitslag van die nadoodse ondersoek.”

Oor bewerings dat Jason en Susan Rohde die aand voor haar dood ʼn hewige argument gehad het, wou Witz nie kommentaar lewer nie. “In die lig van die voortgesette ondersoek en die feit dat die saak sub-judice is, kan ons nie nou hierop kommentaar lewer nie,” het hy gesê.

Van Wyk het gesê niemand is nog in verband met die saak in hegtenis geneem nie.

Lees alle vorige berigte oor Jason Rohde op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
Gert

Ek ruik ‘n vrot, stink rot!!!!

Lucas

Annie. Jy is nou aanklaer en Regter en die man klaar gevonnis. Wat se straf het jy hom gegee Edelagbare?

Adoons

Skelmbosch, lyk dit my, is ‘n gevaarlike plek as mens familie het….

Cherokee

Nog ‘n vraag is waarom nuus oor die Van Breda moorde in Stellenbosch so geheimsinnig stil is.

Carol Pieters

Ja Gert, ek verstaan ook nie hoekom moet mens wag tot daar uitslae is van ‘n nadoodse ondersoek alvoor jy ‘n verklaring moet inhandig nie.