Moordenaar, Huisgenoot-joernalis glo smoorverlief

Marizka Coetzer is as Huisgenoot-verslaggewer geskors hangende ’n ondersoek na haar verhouding met ’n 22-jarige moordenaar. Foto: Facebook

ʼn Sondagkoerant maak vandag nadere besonderhede bekend oor die skorsing van ʼn Huisgenoot-joernalis wat glo te nou betrokke by die Krugersdorp-afspraakmoordsaak geraak het.

Volgens Rapport het een van die veroordeelde moordenaars, Le Roux Steyn (22), glo ʼn liefdesverhouding aangeknoop met Marizka Coetzer (28), wat gereeld oor die opspraakwekkende moordverhoor berig. Hulle het mekaar juis ontmoet terwyl sy oor die saak geskryf het.

Coetzer, wat voorheen ʼn verslaggewer by die Krugersdorp News was, werk ook aan ʼn boek oor die bisarre moordsaak, maar is Vrydag met onmiddellike inwerkingtreding geskors hangende ʼn interne ondersoek in samewerking met die bestuur van Media24, wat Huisgenoot sowel as Rapport besit.

Die Sondagkoerant berig hy het WhatsApp-boodskappe gesien waaruit dit blyk Steyn en Coetzer is in ʼn verhouding. In van die boodskappe vra hy haar glo of sy vir hom sal wag. Coetzer is getroud, maar haar huwelik het na verneem word verbrokkel. Watter rol, indien enige, haar verhouding met die moordenaar hierin gespeel het, in is nie bekend nie.

Coetzer het gereeld vir die gesinstydskrif oor die sogenaamde afspraakmoorde op Krugersdorp berig. Foto: Facebook

Rapport skryf volgens ʼn bron wat nou by die saak betrokke is, is Steyn smoorverlief op die joernalis. Sy het hom glo elke naweek in die gevangenis besoek.

Ma en seun is skuldig bevind aan 11 aanklagte van moord, roof en rampokkery.

Steyn en sy ma, Marinda Steyn (51), is in Mei in die hooggeregshof in Johannesburg gevonnis nadat hulle skuld erken het vir hul aandeel in die vier jaar lange moordtog waartydens 11 mense vermoor is.

Ma en seun is skuldig bevind aan 11 aanklagte van moord, roof en rampokkery. Marinda is tot 11 lewenslange vonnisse en ʼn bykomende 115 jaar tronkstraf gevonnis, terwyl Le Roux tot effektief 25 jaar tronkstraf gevonnis is.

Le Roux en Marinda is saam met Marinda se dogter, Marcel (20), Zak Valentine (33), John Barnard (42) en Cecilia Steyn (37) aangekla. (Cecilia is nie familie van Marinda, Le Roux en Marcel nie.)

Barnard is reeds in 2016 tot 20 jaar tronkstraf gevonnis nadat hy skuld erken het en ingestem het om teen die ander beskuldigdes te getuig. Cecilia, Marcel en Zak het nie pleitooreenkomste met die staat aangegaan nie en hul verhoor duur voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

80 Kommentare

jongste oudste gewildste
Onnie

Goeiste Vader is sy mal in haar kop! Maar by gesê… Soort soek soort – het my Ouma altyd gesê.

Hannes

“Meng jou met die semels dan vreet die varke jou!”

Pop

Onnie jy kan darem nie se sy is sy soort nie. Hys n moordenaar en sy nie. Ek kan nie verstaan wat dit met haar werk te doen het op wie sy verlief is, solank sy haar werk doen.

Lititia

Kyk geen regsdenkende mens sal haar hele lewe opgee vir n moordenaar. Ek kry haar gesin baie jammer . Maar om afgedank of geskors te word daaroor is nie aanvaarbaar. Dis tog haar eie lewe en nie teen die wet

Karlien

Hoewel dit bizar verby is, is dit seker haar saak?