Moordenaar wil ‘geregtigheid ontwyk’ met aansoek om mediese parool

Carl Schoombie is in November 2015 vermoor. (Argieffoto)

Carl Schoombie, die man wat in November 2015 ná ʼn ernstige aanranding dood is, se suster wend haar nou met ʼn petisie tot die minister van korrektiewe dienste om te voorkom dat een van Schoombie se moordenaars op mediese parool vrygelaat word.

Schoombie (27) het op 21 November 2015 saam met vriende by ʼn nagklub in Claremont in Kaapstad gekuier toe ʼn geveg uitgebreek het. Hy was nie daarby betrokke nie en het die klub in ʼn taxi verlaat.

Die taxi is in die rigting van Rondebosch deur ʼn ander voertuig, met twee mans daarin, van die pad gedruk en Carl en sy twee vriende is beskuldig dat hulle die geveg begin het. Hulle het herhaaldelik gesê hulle was nie betrokke nie, maar is nogtans ernstig aangerand.

Schoombie is ná die voorval met ernstige kopbeserings in ʼn hospitaal opgeneem en is ʼn paar dae later dood.

Brent Henry is kort ná die moord in hegtenis geneem, terwyl Juane Jacobs eers in Februarie 2016 in Johannesburg aangekeer is. Die twee is in Mei 2017 skuldig bevind aan die moord op Schoombie en lewenslange tronkstraf opgelê.

Verlede jaar is hul appèlaansoeke om hul vonnisse te laat verminder, van die hand gewys.

Jacobs doen nou aansoek om mediese parool nadat hy vier jaar van sy lewenslange vonnis uitgedien het. In ʼn video van GroundUp sê sy ma, Juliette Salie, Jacobs se lewensgehalte in die tronk is uiters swak. Hy ly boonop aan onderliggende siektetoestande.

GroundUp berig die Leeuwkop-gevangenis, waar Jacobs aangehou word, is van die oorbevolkste tronke in Suid-Afrika en hy is volgens sy familie aanvanklik onder haglike toestande in ʼn hospitaal behandel.

Volgens Salie het haar seun reeds twee hartaanvalle en ʼn beroerte agter die rug, hy was MIV-positief voordat hy tronkstraf opgelê is en nou ontvang hy dialise omdat sy niere ingegee het. Sy voer aan Jacobs is werklik siek – en dat die siekte nie net gaan verdwyn nie – en meen as ʼn gevangene soos oudpres. Jacob Zuma op mediese parool vrygelaat kan word, haar seun se aansoek ook billik oorweeg moet word.

Zuma is 15 maande tronkstraf opgelê weens minagting van die hof. Hy is na sowat twee maande op mediese parool vrygelaat.

Jacobs is volgens GroundUp een van 52 gevangenes wat vanjaar al vir mediese parool aansoek gedoen het. Tot dusver is 16 aansoeke toegestaan, hoewel dit is onduidelik wat die uitkoms van Jacobs se aansoek was.

Schoombie se suster, Jade Southwood, bestempel Jacobs se oproep egter as ʼn “dramatiese pleidooi” in die media om simpatie vir Jacobs te probeer werf.

“Hou in gedagte dat Juane geen berou of simpatie tydens die moordsaak en verhoor getoon het nie,” sê Southwood.

Sy sê Jacobs was drie maande ná die moord op sy broer nog voortvlugtend en is eers aangekeer nadat ʼn groot kontantbeloning vir sy inhegtenisneming aangebied is.

Southwood sê ook Jacobs se aansoek om mediese parool is niks minder as ʼn “poging om geregtigheid te ontwyk” nie.

Sy vra mense om die petisie te onderteken ter ondersteuning van die stryd om geregtigheid vir Schoombie – en om ʼn stokkie voor Jacobs se aansoek om mediese parool te help steek.

“Ons hoop die petisie gaan verandering en geregtigheid verseker, nie net in Carl se saak nie, maar ook in alle moordsake waar mediese parool gesien word as ʼn manier om geregtigheid te ontduik.”

  • Hierdie berig is gewysig sedert dit aanvanklik gepubliseer is. – Red. 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

41 Kommentare

jongste oudste gewildste
Lesly

Zuma se mediese parool het so ‘n bietjie van ‘n presedent geskep. Elke Jan rap en sy maat gaan nou aan skielik Shaik griep ontwikkel.

Janice

Maak my woedend. Nog ‘n ma wat nie wil verstaan laat haar opvoeding haar kind gefaal het nie en daarom het hy ‘n ander onskuldige man doodgemaak. Ek sit my kop op ‘n blok as daar verder ondersoek gedoen word, sal dit wys Jacobs het ‘n geskiedenis vir onskuldige mense opvoeter vir geen rede nie. Hoekom wegvlug as jy niks verkeerd gedoen het nie? Glad nie jammer vir hom nie. Laat hom sit.

Axel

Waar is die petisie verkombaar

Gert

En hier maak Zuma die deur oop vir almal

Mallie

Waar was geregtigheid toe hy Carl aangerand het? Nou wil hy simpatie van die publiek he. Foeitog, laat hom sit.