Die polisie het vier moordsake geopen nadat vier lede van ʼn gesin Dinsdag in ʼn huis in ʼn klein kusdorp in KwaZulu-Natal doodgebrand het.
Pat Symcox, legendariese krieketspeler, oud-Protea en voorsitter van die Mthwalume-huiseienaarsvereniging, het sy skok en hartseer uitgespreek nadat hy en sy vrou Dinsdagmiddag die voorval aanskou het.
Symcox woon al vir 20 jaar in KwaZulu-Natal en skryf op sy Facebook-blad dat hy en sy vrou na die toneel uitgeroep is.
“Ons het ons daarheen gehaas, maar was te laat. Ons is saam met die polisie laaste van die toneel af en het vanmôre met swaar harte wakker geword. ʼn Hele gesin is uitgewis. Dit is ʼn nag wat ek nooit weer wil oorhê nie,” het Symcox geskryf.
Estelle Symcox, Pat se vrou, het op Facebook geskryf: “Aaklig, aaklig … niks wat ek kan sê kan dit eers ʼn bietjie beter maak nie! Vier mense van een gesin!”
Lt.kol. Thulani Zwane, woordvoerder van die polisie, het aan Maroela Media bevestig vier lede van ʼn gesin met ouderdomme wat wissel van nege tot 73 is dood nadat hul huis glo aan die brand gesteek is. “Die motief is in dié stadium nog onduidelik,” het Zwane gesê.
Volgens hom is vier sake van moord by die Hibberdene-polisiestasie aanhangig gemaak.
Soveel hartseer dinge wat die tyd van die jaar gebeur wanneer almal saam moet wees in liefde.
Die wereld om ons raak by die dag sieker en meer boos. Nie dat daar n goeie of beter tyd is vir so iets nie, maar so iets… hierdie tyd van die jaar? SIEK
Ja, as 12 jarige jong seun het ek mense in n motorvoertuig sien dood brand dit was vreeslik en die reuk sal my altyd by bly. Is noual in my sestiger jare.