Mosie van wantroue teen Zuma dán aangehoor

Pres. Jacob Zuma tydens die kwartaallikse vraag-en-antwoord-sessie in die parlement (22 Junie 2017). Foto: Parlement

Die parlement het Vrydag aangekondig wanneer ʼn mosie van wantroue teen pres. Jacob Zuma wat deur die DA ingestel is, gedebatteer sal word.

Moloto Mothapo, woordvoerder van die parlement, het in ʼn verklaring bevestig die mosie sal op 3 Augustus in die parlement gedebatteer word. Volgens Mothapo beteken dit dat die nasionale vergadering se sitting vroeër sal begin as beplan.

“Die besluit [oor die datum] het ook in ag geneem dat sommige van die komitees van die nasionale vergadering tans besig is met oorsigbesoeke en die parlement het Julie oopgelaat vir kiesafdelingwerk,” het hy gesê.

Die DA het die eerste versoek vir die mosie op 30 Maart vanjaar ingedien en die mosie sou aanvanklik op 18 April gedebatteer word. Die mosie is egter op ys geplaas nadat die United Democratic Movement (UDM) en die EFF ʼn aansoek voor die konstitusionele hof ingedien het om te versoek dat die mosie met ʼn geheime stemming beslis word.

Die konstitusionele hof het op 22 Junie bevind dat speaker Baleka Mbete verkeerd was toe sy gesê het sy is nie by magte om te besluit oor die geheime stemming nie. Die hof het beslis dat Mbete nou weer ’n besluit moet neem op grond van die uitspraak. Hoofregter Mogoeng Mogoeng het gesê daar is geen regsgronde waarvolgens die hof die speaker kan dwing om op ’n geheime stemming te besluit nie.

Mothapo het gesê die speaker het nog nie besluit of die mosie van wantroue met ʼn oop of geheime stemming beslis sal word nie. Mbete het enige partye wat belangstel, uitgenooi om hul voorkeur oor die stemproses vir hierdie spesifieke mosie voor 14 Julie by haar in te dien, sodat sy dit in ag kan neem vir haar besluit.

“Die speaker sal haar besluit oor die stemproses bekendmaak voor die debat op 3 Augustus moet plaasvind,” het Mothapo gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Pieterlewismuts

Ek is bekommerd dat die lang gespook tussen dat die geheime stemming eerste keer aanhangig gemaak is tot dat dit werklikheid word vir ongure karakters genoeg geleentheid kan gee om die stelsel binne te dring te onderskep en n rekord te hou van wie hoe gestem het en so in wese die geheime stemming binne te dring en aan “gekose individue” dan “openbaar” te maak. Die opposisie behoort nou aan te dring op metode of stelsel wat onderskepping van die geheime stemming in feite onmoontlik maak. Ek verwag enige vorm van vuilspel deur die Zumaiete om daardie stemming te kelder… Lees meer »

Nel

Afrika se gemenespel/bedrog wat stemmery aangaan is al oorbekend. Die Zuma-kartel sal wel ‘n plan of twee beraam om die uitslag in Z se guns te laat tel.

humor

z se selfversekerdheid spreek boekdele!!!!!!!!!!!!

popeye

Aaag wat…. rooi kolletjie – das, oop-arm, hê-hê, stortkop liegbek moet waai! Finish en klaar! Swakste “staatsman” ooit!

Cherokee

Dit mag wees dat dit bloot ‘n verskil in grammatikale mening is maar die eerste paragraaf in hierdie berig sê dat die DA verantwoordelik is vir Jakop Zoema se instelling. “Jakop Zoema wat deur die DA ingestel is”. Nou weet julle (ondermeer) waarom ek julle wat DA is nie like nie.