‘Motordiewe’ vas ná jaagtog, skietgeveg

Twee vermeende voertuigdiewe is in hegtenis geneem nadat hulle tydens ʼn hoëspoedjaagtog met twee polisievoertuie gebots het.

Foto: Marshall Security

Kol. Thembeka Mbhele, woordvoerder van die KwaZulu-Natalse polisie, het gesê ʼn motor is Dinsdagmiddag in KwaMakhutha naby Amanzimtoti gesteel.

Die polisie se provinsiale taakspan en Durban-Sentraal se honde-eenheid het die verdagtes in die gesteelde motor omstreeks 15:30 opgespoor en hulle agternagesit.

Die verdagtes het in Dumisani Makhaye-rylaan teen aankomende verkeer ingejaag en teen twee polisievoertuie gebots voordat dit die pad verlaat en ʼn lamppaal getref het.

“Die verdagtes het uitgespring en te voet gevlug terwyl hulle op die polisiebeamptes geskiet het,” het Mbhele gesê.

“Die polisie het teruggeskiet en twee verdagtes is in hegtenis geneem. ʼn 9 mm-pistool en ammunisie is op die toneel gevind.”

Volgens Mbhele het die verdagtes en ʼn polisiebeampte beserings in die botsing opgedoen, maar niemand is tydens die skietgeveg gewond nie. Die beseerdes is almal na ʼn hospitaal geneem.

Die verdagtes sal binnekort in die Ntuzuma-landdroshof verskyn op aanklagte van besit van ʼn gesteelde voertuig, besit van ʼn ongelisensieerde vuurwapen en poging tot moord.

Foto: Marshall Security

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.