Motorfietsongelukke eis drie

Foto: Netcare 911

Foto: Netcare 911

Drie mans, waaronder ’n matriekleerling aan Hoërskool Montana in Pretoria, het die afgelope drie dae in afsonderlike motorfietsongelukke gesterf.

ʼn 52-jarige man is Maandagmiddag in Lavenderweg in die noorde van Pretoria in ʼn ongeluk dood. “Volgens ooggetuies het die man beheer oor sy motorfiets verloor en geval,” het Mirna Von Benecke, ʼn polisiewoordvoerder van die Sinoville-polisiestasie, aan Maroela Media gesê. Sy motorfiets het gegly en teen ʼn ander voertuig gebots. Die man, wie se naam weerhou word totdat sy naasbestaandes in kennis gestel is, is op die toneel dood verklaar.

Brandon Fifield (18) is Vrydagaand omstreeks 23:00 dood nadat sy motorfiets ʼn Ford Ranger-bakkie op die hoek van Dr. Swanepoelweg en Derdestraat in Montana, ook in die noorde van Pretoria, getref het. Hy is ook op die toneel dood verklaar.

Fifield en sy vriend, Jurgen Appel, was albei op die motorfiets. Appel is met ʼn ambulans na die nabygeleë Montana-hospitaal geneem.

Isak Jacobs, die hoof van Hoërskool Montana, het gesê hy, die personeel, beheerliggaam en medeskoliere betuig hulle innige meegevoel met Fifield se familie. “Ons bid hulle Sy vertroosting toe,” het hy op die skool se Facebook-blad gesê. Hy het gesê dit gaan goed met Appel en het hom ʼn vinnige herstel toegewens. Von Benecke het gesê ʼn saak van strafbare manslag word ondersoek.

Intussen is Fernando “Goosi” Ferreira, die adjunkpresident van die Blazing Aces-motorfietsklub, Saterdag ook in ʼn ongeluk op die N12 in Boksburg, Ekurhuleni oorlede. Hy laat sy verloofde en jong dogtertjie agter.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Erica ·

Dis met groot hartseer wat ek hier gelees het.

Baie sterkte aan elkeen se geliefdes, afskeid is en bly bitter swaar.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.