Twee motorfietsryers is Vrydag op die N1-suid vir spoedoortredings in hegtenis geneem.
Hoofsupt. Wayne Minnaar, woordvoerder van die Johannesburgse metropolisie, sê die eerste motorfietsryer is op sy BMW-motorfiets vasgetrek waar hy 271km/h in ʼn 120km/h-sone gery het naby die Maraisburg-afrit. Minnaar sê die motorfietsryer het versuim om te stop. “Min het hy geweet dat daar 3km vorentoe ʼn padblokkade was.” Hy is in hegtenis geneem en aangekla van roekelose bestuur en versuim om vir ʼn verkeersbeampte te stop. Die motorfiets het ook nie nommerplate op gehad nie. Die verdagte sal Dinsdag in die Roodepoort-landdroshof verskyn.
Minnaar sê ʼn 21-jarige man sal ook Dinsdag in die Roodepoort-landdroshof verskyn nadat hy teen 206km/h in ʼn 120km/h-sone vasgetrek is. Minnaar sê die man se motorfiets het ook nie nommerplate opgehad nie. “Hy was op sy motorfiets met ʼn vroulike passasier.” Minnaar sê hy is op dieselfde stuk pad in hegtenis geneem as die ander motorfietsryer.
Volgens Minnaar verwyder talle motorfietsryers die nommerplate van hul motorfietse af ten einde spoedkameras te ontduik.
Wat is fout met mense wat die spoed ry, is dit nie tyd dat mense se koppe ook getoets word saam met die oog toets.