Motoris gesoek ná ‘rower’ se skietdood

Argieffoto ter illustrasie

Die Oos-Kaapse polisie is op soek na ʼn man wat ’n vermeende rower Donderdagaand in Port Elizabeth doodgeskiet het.

Kol. Priscilla Naidu, woordvoerder van die polisie, het in ’n verklaring gesê die voorval het in Parkweg in Humewood plaasgevind.

Volgens Naidu het die bestuurder van ’n wit VW Polo omstreeks 23:30 in dié motor gesit toe hy deur twee onbekende mans genader is. Een van die mans (31) het tot by die motorvenster van die bestuurder geloop en daarop aangedring dat die bestuurder sy venster oopmaak.

Toe die bestuurder weier om die venster oop te maak, is ’n klip deur die venster gegooi.

Dit is toe dat die bestuurder van die motor uit sy voertuig geklim en na bewering op die twee mans losgebrand het. Die 31-jarige man het verskeie skietwonde in die voorval opgedoen. Sy makker kon egter daarin slaag om op die vlug te slaan.

Volgens Naidu het die bestuurder van die motor ná die voorval van die toneel weggery. Die oorledene se liggaam is op die toneel aangetref.

Die polisie ondersoek nou ’n saak van moord. Die bestuurder van die VW Polo is in dié stadium steeds soek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Werner

Hoop nie die polissie soek te hard nie

Ja Wat

Nooit te oud om te leer om ander mense te los.

Genis

Tragies ne? Los ander mense uit…

Hendrik

Hy het mos geweet hy gaan moeilikheid kry as hy klip gooi en anderman se eiendom beskadig

JohanR

Seker nie gedink die man het ‘n geweer nie. Miskien ‘n geweer wat Bheki Cele wou ingehandig he, toe se die man bogger jou Hoed!