Motoris glo verkrag tydens betoging

(Argieffoto: Pixabay.com)

ʼn Motoris is na bewering verkrag toe sy Saterdagaand in die middel van ʼn betoging langs Klipspruit Valley-weg in Kliptown, Johannesburg, beland het.

Kol. Lungelo Dlamini, woordvoerder van die polisie, sê inwoners het gisteraand aan ʼn gewelddadige betoging deelgeneem nadat kragtoevoer na die gebied onderbreek is. Die betoging het nie net in die beskadiging van private voertuie ontaard nie, maar het ook gelei tot ernstige geweldsmisdade soos die beweerde verkragting, sê Dlamini.

“Daar word vermoed dat meer as 20 motoriste geraak is, onder wie ʼn vrou wat verkrag is. Verskeie sake is by die polisie aanhangig gemaak, insluitend opsetlike saakbeskadiging, aanranding met die doel om ernstig te beseer, verkragting en openbare geweld,” sê hy.

“Die polisie doen ʼn beroep op lede van die publiek wat dalk tydens die betoging beseer is om na vore te kom.”

Lt.genl. Elias Mawelo, provinsiale polisiekommissaris in Gauteng, het die geweld teenoor lede van die publiek en beskadiging van eiendom tydens betogings ten sterkste veroordeel. “Misdadigers wat hulself as betogers voordoen met die doel om lede van die gemeenskap te terroriseer, sal vasgetrek word en aan die pen ry,” het Mawelo gesê.

Enigiemand met meer inligting oor wie gisteraand by die aanval op die motoriste betrokke was, word versoek om 08600 10111 te skakel. Inligting kan anoniem deurgegee word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Willehond

Het die polisie hulle darem gemonitor?

leser

en hoeveel van die betogers is in hegtenis geneem ???

Talie

Maar die twee boere wat skote afgevuur het tydens so betoging verlede week ry nou aan die pen en word aangekla.
Wanneer gaan daar opgetree word?

Hansie Slim

Asseblief Elias, ons weet daar sal dadels van kom!!!

Buks Barnard

… en steeds noem Malroela Media die TERRORISME “betogings”.