Motoris skiet ‘ysterpenboef’ dood

Ysterpenne op paaie. (Foto: Gautengse verkeerspolisie)

Drie vermeende ysterpenboewe het Vrydag hul moses teëgekom toe hulle ’n egpaar – wat ʼn pap motorband in Akasia, Pretoria, vervang het – wou beroof.

Die verdagtes het op die egpaar toegeslaan en begin skiet, maar egter nie verwag dat die man ook ʼn vuurwapen sou uitruk en terugskiet nie. Hy het een van die verdagtes in die proses doodgeskiet.

Volgens lt.kol. Mavela Masondo, polisiewoordvoerder, het die voorval omstreeks 21:00 op die R80-hoofweg by Akasia afgespeel.

Volgens Masondo het die egpaar in die verdagtes se lokval beland – nadat hulle na bewering ysterpenne in die pad geplaas het met die doel om motoriste te beroof. Die egpaar was verplig om stil te hou om hul motor se pap band te vervang.

“Die man was besig om die motor se band om te ruil en die vrou het langs die motor gestaan toe drie gewapende verdagtes glo op hulle begin skiet het,” bevestig Masondo.

“Die man het teruggeskiet en een van die verdagtes in die bolyf raakgeskiet. Die ander twee verdagtes het onmiddellik spore gemaak.”

Volgens Masondo het lede van die blitspatrollie wat in die omgewing gepatrolleer het die skote gehoor en gaan ondersoek instel.

“Met hul aankoms op die toneel het hulle die gewonde verdagte op die grond aangetref. ʼn Replika-vuurwapen is langs hom gevind. Hy is later deur paramedici op die toneel dood verklaar.”

Die polisie het ʼn soektog van stapel gestuur om die oorblywende verdagtes op te spoor.

Masondo het ʼn beroep op motoriste gedoen om die R80-hoofweg in die aand te vermy omdat vermeende ysterpenboewe gewoonlik dan toeslaan.

Voorvalle waar motoriste in soortgelyke moeilikheid beland het, is ook gereeld op die N4-snelweg en die R566 in Gauteng aangemeld. Volgens Masondo het die polisie reeds ysterpenvoorvalle op paaie in Gauteng geïdentifiseer en redelik onder beheer gekry, veral op bogenoemde paaie.

ʼn Paar voorvalle is ook in Augustus op die N1-snelweg tussen Polokwane en die Kranskop-tolplaza buitekant Modimolle en die R101 in Limpopo aangemeld. Vier verdagtes het Vrydag in die landdroshof in Mokopane rakende hierdie voorvalle verskyn.

“As motoriste vermoed hulle het ʼn pap motorband, moet hulle die polisie onmiddellik in kennis stel deur die polisie se noodnommer by 10111 te skakel. Motoriste moet ook hul onmiddellike omgewing dophou en waaksaam bly, veral in die aande. Ons moedig motoriste aan om, indien moontlik, eerder na die naaste vulstasie of polisiestasie te ry wanneer hulle ʼn pap band kry.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
Suzette

Uitstekend!

Pieter

Die polisie moer eerder hulle werk begin doen , en die wetsgehoorsame burgers beskerm. Goed geoden ou maat, jammer jy kon nie almal van hulle bokveld toe stuur nie.

Pierre

En ou hoed wil ons ontwapen! Jammer hy kon net 1 uitvat.

Ian

Oefen meer met jou vuurwapen. Enigste manier om n boodskap te stuur is wanneer hulle met dieselfde gemoed gegroet word. Jou lewe is niks vir hom nie sy lewe is ook niks. Skiet of jy word beroof en heelmoontlik geskiet.

Zacahara

Bravo!!