Van Reenenspas Foto: panoramio.com
Motoriste word gewaarsku teen gure weer en sterk winde op die N3 tussen Donderdagaand en Sondagaand, het die N3-tolpad-konsessie (N3TC) gesê.
“Daar is ‘n sterk moontlikheid van sneeuval hierdie naweek in die suidelike Vrystaat, KwaZulu-Natal Drakensberg en talle dele van Lesotho,” het Andy Visser, woordvoerder vir die N3TC, in ‘n verklaring gesê. Sy het gesê motoriste kan sterk winde by die Van Reenenspas naby Harrismith en in Estcourt en Ladysmith te wagte wees.
“Dit is moontlik dat ‘n yslaag op die padoppervlak kan vorm wat ‘n groot gevaar vir enige voertuig inhou,” het Visser bygevoeg. “Motoriste moet hul spoed verminder en baie goed konsentreer.”
Sy het gewaarsku dat gedeeltes van die pad moontlik vir verkeer gesluit kan word indien die toestande nie veilig is nie. Motoriste word gewaarsku om ekstra komberse, kos en ander benodigdhede in te pak indien hulle moontlik vasgevang word in lang padsluitings.
Die N3TC is verantwoordelik vir die N3 tussen Heidelberg in Gauteng en Cedara in KwaZulu-Natal.
