MRK eis R150 000 van man wat land van wit mense wil ‘reinig’

Velaphi Khumalo. Foto: Via Facebook

Velaphi Khumalo, ʼn werknemer van die Gautengse departement van sport, kuns, kultuur en ontspanning, is Maandag en Dinsdag deur die menseregtekommissie (MRK) voor die gelykheidshof gedaag vir haatspraak.

Khumalo het na bewering in Januarie 2016 in reaksie op die Penny Sparrow-debakel op sy Facebook-blad gesê dat hy “die land van wit mense wil reinig” en dat daar teen wit mense opgetree moet word soos Adolf Hitler teen die Jode gemaak het. Hy het in ’n tweede inskrywing op Facebook gesê wit mense in Suid-Afrika verdien om soos Jode opgekap en doodgemaak te word.

Die verhoor is in ʼn sitting in die Suid-Gautengse hooggeregshof in Johannesburg aangehoor.

Buang Jones, provinsiale bestuurder van die MRK, het Woensdag aan Maroela Media gesê albei partye se betoë is gelewer en dat die regter sy uitspraak voorbehou het.

Jones het gesê die kommissie het aangevoer dat Khumalo se uitlatings op haatspraak neerkom en hy dus gedwing moet word om ʼn onvoorwaardelike openbare verskoning aan alle Suid-Afrikaners te maak en om skadevergoeding van minstens R150 000 te betaal wat aan ʼn instansie geskenk sal word wat versoening en sosiale samewerking bevorder.

Die MRK versoek ook dat Khumalo verbied moet word om in die toekoms soortgelyke aanmerkings op openbare platforms te maak. Die MRK wil verder die direkteur van openbare vervolging versoek om Khumalo strafregtelik te laat vervolg.

“Ons kan nie met sekerheid sê wanneer die regter se uitspraak verwag kan word nie. Dit kan tussen drie tot ses maande neem. Dit is ʼn ingewikkelde saak wat verreikende gevolge kan hê,” het Jones gesê.

Die ANC het Khumalo reeds in 2016 voor die gelykheidshof gedaag vir haatspraak en onbillike diskriminasie. Khumalo is gevolglik ʼn boete van R30 000 opgelê en moes gemeenskapsdiens verrig. Die MRK het egter gevoel dié straf is nie swaar genoeg nie, waarna die kommissie Khumalo voor die gelykheidshof gedaag het.

Khumalo se verdediging is van mening hy is reeds vir sy optrede beboet en dat die saak laat vaar moet word.

Jones het gesê Khumalo werk nog vir die departement van sport, kuns, kultuur en ontspanning, en dat hy ná ʼn interne ondersoek oor die aangeleentheid deur die departement ʼn finale geskrewe waarskuwing ontvang het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

65 Kommentare

jongste oudste gewildste
Jacqui

Uhm, nee…. Nie goed genoeg. Vicky Momberg is vir minder agter tralies gestop. Sy uitlating is veel erger.

Tronk toe met jou!!!

Rupert Ashford

As hierdie sake ewehandig hanteer word, moet hy tronkstraf kry. Die presedent is geskep.

Tanzie

Ja nee, ons land stop mense in die tronk wat aangekla word van die “so called K-word” maar dit is reg om links en regs te verkondig dat wit mense geslag moet word.

TDW

Ek wil sê dat hierdie tronkstraf verdien, maar eintlik is haatspraak net ‘n opinie, en enige vorm van opinie is nie veronderstel om ‘n misdaad te wees nie tensy dit na geweld lei, dan kan dit as kriminele optrede geklassifiseer word. Hierdie persoon werk egter in die regering en is nie net enige jan-rap en sy maat nie(soos ‘n penny of ‘n vicky nie).

Verstom

Vicky Momberg is tronk toe vir ‘n oortredingvan nie NAASTENBY die omvang van hierdie oortreding nie. Haar saak is ook spoedig afgehandel. Khomalo se saak sloer al meer as 2 jaar! Oor sy straf word ge-oe en ge-aa! Sluit hom toe!!