MRK verkla Agrizzi by gelykheidshof

Angelo Agrizzi, voormalige operasionele hoof van die omstrede fasiliteite-bestuursgroep Bosasa. Foto: Simphiwe Mbokazi /ANA

Die Menseregtekommissie (MRK) gaan Angelo Agrizzi, die voormalige Bosasa-bedryfshoof en fluitjieblaser, by die gelykheidshof verkla.

Dit volg nadat Agrizzi by die Zondo-kommissie van ondersoek na staatskaping erken het dat hy rassistiese uitlatings gemaak het.

Agrizzi het Dinsdag erken hy is ʼn rassis nadat ʼn opname waarin hy die k-woord gebruik om na sy oudkollegas Papa Leshabane en Johannes Gumede te verwys, aan die Zondo-ondersoekkommissie voorgestel is.

In die opname kan gehoor word hoe Agrizzi tekere gaan en herhaaldelik die k-woord gebruik. Volgens Gail Smith, woordvoerder van die MRK, is Agrizzi kwaadwillig en sal dit eensgesinde individue aanmoedig om dieselfde te doen indien daar geen stappe gedoen word nie.

“Die kommissie meen dat Agrizzi haatspraak gepleeg het en sal om dié rede en in openbare belang ʼn gepaste gevolg versoek, waaronder ʼn bevel vir die betaling van skadevergoeding en ʼn bevel om die klerk van die gelykheidshof opdrag te gee om die saak aan die direkteur van openbare vervolgings voor te lê vir die moontlike instelling van strafregtelike optrede teen Agrizzi.”

Agrizzi het in sy getuienis erken hy is ʼn rassis. “Ek is rassisties … oordeel my daarvoor … Dis in die haak,” het Agrizzi gesê voor hy verskoning gevra het vir sy uitlating en gesê het hy is “verleë en skaam”.

Regter Raymond Zondo, voorsitter van die kommissie, het gesê Agrizzi se getuienis sal ondersoek word soos van ʼn regter verwag word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
MJ Kroezen

Nou gaan al die skelms weg kruip agter Rassisme

E.K. die eerste

Jip, trek die aandag weg met hierdie storie en verloor die werklike rede van die kommissie se ondersoek uit die oog. Want Zuma en spul ander “hoës” is mos betrokke so kom ons hamer op rassisme. En ek praat nie goed wat hy gesê het nie, maar hou by die saak!

willie

Jy kan maar moor, verkrag, aanrand, bedrog pleeg, ens. MAAR moet tog net nie die k-woord gebruik nie!

Roger Rothner

Ek is nie so seker of getuienis wat by die kommissie afgelê is, teen hom gebruik kan word nie. Rxxx

Henk

Hulle is vinnig om te reageer wanneer die k-woord ter sprake is.
Wanneer gaan hulle met dieselfde bekwame spoed optree wanneer na blankes met allerlei rassistiese name verwys word?