Mthethwa wil KSA se finansiering, erkenning terugtrek

Minister Nathi Mthethwa. (Foto: Kopano Tlape/GCIS)

Die minister van sport wil ingevolge wetgewing sy magte gebruik om Krieket Suid-Afrika (KSA) nie langer te erken as die beheerliggaam van krieket in die land nie.

Dit kan daartoe lei dat KSA uit die Internasionale Krieketraad (IKR) geskors word en ook dat die regering finansiering vir KSA kan terugtrek. Volgens minister Nathi Mthethwa sal hy die IKR van sy besluit in kennis stel.

In ’n sterk bewoorde brief aan KSA se interimraad en lederaad het Mthethwa die beheerliggaam amptelik ingelig dat hy sy magte kragtens artikel 13(5) van die Wet op Sport en Ontspanning gaan uitoefen en dat die besluit so gou as moontlik in die Staatskoerant gepubliseer sal word.

“… ek het tot die gevolgtrekking gekom dat daar steeds irrasionele lede is in die lederaad wat onverbiddelik gekant is om die bestuurstruktuur van KSA te verander, veral met betrekking tot ’n onafhanklike meerderheidsraad en ’n onafhanklike voorsitter,” voer Mthethwa in sy skrywe aan.

Volgens die minister kan krieket in die land nie gyselaar gehou word deur minderheidslede van die lederaad nie.

Sekere lede van KSA se lederaad wou nie die naweek wysigings aan die beheerliggaam se grondwet aanvaar nie, ten spyte van hul aanvanklike voorneme om dit wel te doen.

Hierdie wysiging behels ’n ooreenkoms tussen die lederaadslede en die tussentydse raad, wat deur Mthetwa aangestel is om KSA uit sy administratiewe verknorsing te probeer red. Daar was onder meer gepoog dat krieket se raadslede ’n meer onafhanklike baadjie in Suid-Afrika aantrek.

KSA se interimraad het intussen in reaksie op Mthethwa se voorneme om finansiering te staak en die beheerliggaam nie te erken nie, gesê dit is ’n baie hartseer dag vir die land, vir krieket, sy borge en die miljoene Suid-Afrikaanse ondersteuners van die spel.

“Maar dit is spesifiek ’n hartseer dag vir die spelers, personeel en ander wie se lewensbestaan op die spel is,” het Stavros Nicolaou, voorsitter van KSA se tussentydse raad, gesê.

Nicolaou meen krieket in Suid-Afrika is nou op sy knieë en dat die jongste verwikkelinge die “grootste krisis sedert hertoelating” tot gevolg gaan hê. “Die raad loof die meerderheid van die lederaad wat goeie bestuur steun en ten gunste van ’n moderne bestuurstruktuur vir krieket gestem het. Dit is diep teleurstellend dat ’n minderheid met eiebelang teen verandering gestem het, terwyl drie lede verkies het om buite stemming te bly.”