Mugabe sê model het haar met mes aangeval

Grace Mugabe. Foto: (AP Photo/Tsvangirayi Mukwazhi, File)

Grace Mugabe, Zimbabwe se presidentsvrou, het ontken sy het die model Gabriella Engels verlede maand in ʼn hotel in Sandton met ʼn verlengkoord aangerand en daarenteen beweer dat ʼn “dronk en versteurde” Engels haar met ʼn mes aangeval het.

In ʼn verklaring wat op 17 Augustus afgelê is, en wat Reuters onder oë gehad het, ontken Mugabe die 20-jarige Engels se weergawe van die gebeure. In teenstelling daarmee beeld Mugabe haarself as die slagoffer uit wat namens haar twee volwasse seuns, Chatunga en Robert jr., ingegryp het omdat hulle “in die moeilikheid was met ʼn dronk jonk vrou”.

In die verklaring word genoem dat Mugabe oorweeg om ʼn aanklag van poging tot moord aanhangig te maak.

Engels het vroeër beweer ʼn woedende Mugabe het op 13 Augustus in die hotelkamer ingestorm waar sy saam met twee vriende vir Chatunga gewag het. Sy beweer Mugabe het begin om haar met ʼn elektriese koord aan te rand. Foto’s wat kort ná die voorval geneem is, toon oop wonde aan Engels se voorkop en kop, asook kneusplekke op haar bobene.

Mugabe het in haar verklaring gesê Engels se weergawe van die gebeure is “kwaadwillige bewerings”. Sy het gesê sy is aangeval omdat sy probeer het om haar seuns te help. “Sy was bekommerd oor hulle en het gegaan om hulle in hul hotelsuite te sien,” lui die verklaring.

“By haar aankoms het me. Engels, wat dronk en versteurd was, dr. Grace Mugabe met ʼn mes aangeval nadat sy gevra is om die hotel te verlaat. Veiligheidswagte is met geen ander opsie gelaat nie as om me. Engels uit die hotelsuite te verwyder.”

Gabriella Engels beweer dat Zimbabwe se presidentsvrou, Grace Mugabe, haar aangerand het. Foto: ANA

In die verklaring word ook aangevoer dat Engels die vorige aand in ʼn bakleiery betrokke was met ander vroue by die Taboo-nagklub in Johannesburg en dít kan die moontlike oorsaak van haar beserings wees.

Die burgerregte-organisasie AfriForum, wat namens Engels optree, het die bewerings ontken. “Gabriella het nooit vir Grace Mugabe op enige manier aangeval nie en was ook nie deel van ʼn bakleiery by Taboo nie,” het AfriForum gesê.

“Dit is duidelik dat Grace Mugabe desperaat besig is om verantwoordelikheid vir haar eie gewelddadige gedrag te ontduik deur leuens te gebruik om die slagoffer in hierdie saak as die oortreder uit te beeld.”

Die Suid-Afrikaanse regering het verlede maand diplomatieke immuniteit aan Mugabe toegestaan nadat ʼn klag van aanranding teen haar aanhangig gemaak is. Mugabe is derhalwe toegelaat om die land te verlaat sonder om vervolg te word.

Engels en AfriForum betwis hierdie besluit in die hof en voer aan Grace Mugabe was nie in Suid-Afrika in ʼn amptelike hoedanigheid nie. Hulle voer ook aan dat die oortreding as ʼn ernstige misdaad geklassifiseer word wat volgens wet nie deur diplomatieke immuniteit beskerm word nie.

Die DA het hom ná Mugabe se vertrek tot die konstitusionele hof gewend om die toestaan van die diplomatieke immuniteit te betwis.

Lees alle vorige berigte oor Grace Mugabe op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
De Villiers

Sy het ‘n mes by haar gehad, Grace daarmee aangeval, en Grace het genoeg tyd gehad om eers ‘n koord te soek en op te tel voordat Engels by haar kon uitkom? Verder sou Engels heel aand met ‘n gapende wond op haar voorkop gaan rondkuier sonder om besorg daaroor te wees. Regtig? Onderskat Grace die gemiddelde mens se intelligensie?

John

?… en nou wil die burgerregte organisasie die vuil speletjie betree… Is dit hul verantwoordelikheid?

Johann

Ongelooflik om te dink dat Me Grace dat sy So kan lieg en logies denkende normale mense gaan haar glo? AFRIKA LEGACY! Geweld deur onaantasbare magsbeheptes rule en regulate!!!

Willie

Van waneer af is sy n DR.

Eish

Een ding wat ek van politici geleer het is die hol woorde wat so kwistig aangewend word. Dus, om die ware toedrag van sake te bepaal, moenie ag slaan op die woorde wat gebesig word nie, laat hul dade die praatwerk doen. Met politici dus, waarmee ons die agbare presidentsvrou mee kan vereenselwig, gaan die veiligheidswagte wat haar omring, en haar bedorwe brokkies, verklarings indien met dié strekking.