Argieffoto
ʼn Staking wat ontwrigtings op die MyCiTi-busroetes in Kaapstad veroorsaak het, is verby.
“ʼn Ooreenkoms, wat deur die Kommissie vir Versoening, Bemiddeling en Arbitrasie (KVBA) bewerkstellig is, het ʼn einde aan die twee dae lange staking gebring,” het Brett Herron, burgemeesterskomiteelid vir vervoer, gesê. “Minstens 80% van die bestuurders sal van nou af tot aan die einde van vanaand [Donderdag] hul skof voltooi. Alle bestuurders sal na verwagting môreoggend vir diens aanmeld en die busdiens sal dan weer ten volle in werking wees.”
Hy het gesê die hoofroete tussen Dunoon, Tafelbaai, die Burgersentrum en die Waterfront, sowel as die roete tussen Kaapstad Internasionale Lughawe en die Burgersentrum is nie Donderdag deur die staking geraak nie.
Verskeie bestuurders van die TPI-voertuigbedryfsmaatskappy het Woensdag om 05:00 begin staak. Herron het gesê dit was ʼn onbeskermde staking en die rede was nie duidelik nie.
Bestuurders van ander busmaatskappye is gehuur om met die ontwrigting te help. -SAPA
Lees ook:
MyCiTi-busbestuurders staak in Kaapstad
