Mynbou-indaba: ‘Korrupsie het mynbedryf lamgelê’

Roger Baxter, uitvoerende hoof van die Mineraleraad (Foto: Songezo Ndlendle/ANA)

Die skade wat aan die Suid-Afrikaanse ekonomie aangerig is oor die nege jaar voor Cyril Ramaphosa president geword het, het ʼn groot impak gemaak op beleggingsmoontlikhede in die mynboubedryf, het Roger Baxter, uitvoerende hoof van die Mineraleraad (voorheen die Kamer van Mynwese), Dinsdag gesê.

“Toe ons ʼn jaar gelede in Kaapstad aangekom het vir die 2018-indaba was die sakegemeenskap versigtig optimisties dat dinge sou verbeter, en dit is omdat Cyril Ramaphosa in daardie stadium die vorige Desember as ANC-president verkies is,” het hy gesê.

“Dit was nog 10 dae voor mnr. Ramaphosa die president van die republiek geword het en 21 dae voor Gwede Mantashe aangewys sou word om [Mosebenzi] Zwane te vervang as minister van minerale hulpbronne.”

Baxter het by die 25ste jaarlikse Mynbou-indaba wat tans by die Kaapstadse internasionale konvensiesentrum plaasvind.

Sedert Ramaphosa en Mantashe se aanstellings, het die sake- en mynbouomgewing verander. “Spesifiek vir mynbou het die minister ʼn baie soortgelyke benadering gevolg. Ons is heeltemal bewus van die skade wat aangerig is aan ons ekonomie en ons instansies oor die nege jaar voor mnr. Ramaphosa as president aangewys is. Die wanbestuur en korrupsie wat in daardie periode plaasgevind het, het ʼn groot impak gehad op beleggingsmoontlikhede in die mynboubedryf.”

Volgens Baxter beraam die Mineraleraad dat die bedryf in 2018 ongeveer 7,3% tot die bruto binnelandse produk (BBP) bygedra het, wat effens hoër is as die 6,8% in 2017.

Die mynboubedryf het in 2018 met 1,2% gegroei en verteenwoordig ʼn groeikoers effens hoër as die algemene ekonomie. “Dit is egter nie iets om oor tevrede te wees nie, aangesien die algehele groei teleurstellend bly,” het Baxter bygevoeg.

“Indiensneming in die mynboubedryf het steeds bly daal, maar waarskynlik minder as wat mens sou verwag. In 2018 was ongeveer 454 000 persone direk werksaam in die bedryf. Mynbou-indiensneming verteenwoordig ongeveer 5% van nie-landbou-indiensneming. Ons beraam dat daar vir elke direkte pos in mynbou, twee poste in die ekonomie geskep word.”

Baxter het gesê die bedryf het in 2018 ongeveer R93 miljard tot vaste beleggings bygedra, wat 17% van die privaat sektor se vaste belegging verteenwoordig en 10,5% van die land se algehele vastebeleggingspandering vir die jaar.

“Daar was egter byna geen groei in vaste beleggings in die bedryf tydens 2018 nie. Die bedryf het R312 miljard se kommoditeite in 2018 uitgevoer, 25% van die land se R1,25 biljoen (“trillion”) in uitvoerverkope en noodsaaklike buitelandse valuta gegenereer. Hierdie bydrae styg tot meer as 40% wanneer veredelde minerale tot primêre minerale uitvoere bygevoeg word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Afrikaner

Maar julle wat hier bo gelees het, het dan seker ook die artikel by hiérdie skakel gelees:
https://maroelamedia.co.za/debat/meningsvormers/agrizzi-het-besluit-om-te-sing/

Michael

En ou Zuma hou partytjie elke aand. Die oorsaak van alles.

Snoefie

Nie n sekere mynboumanifes wat onder andere blankes oor die ouderdom van 55 uit die mynbou mark verdryf het nie?

Johanna Botha

En almal kom weg …..NIKS gebeur nie !

Manie

CR was die onder president in die tydperk en hy’t nie sy mond oopgemaak. Hy’s net so korrup soos Zuma