‘Nagmerrie op nagmerrie’ in staatshospitaal

Roelof Riese (Foto: Verskaf)

’n Man van Vereeniging se familie sê hy is slegter af nadat hy ʼn operasie in ʼn staatshospitaal ondergaan het, as wat hy was ná die motorfietsongeluk wat die operasie in die eerste plek genoodsaak het.

Roelof Riese (36) het in September sy bekken gebreek en inwendige bloeding opgedoen toe hy agter in ’n motor vasgery het. Die ongeluk het in Brockett-straat in Meyerton plaasgevind.

Die bestuurder van die motor het Riese vermoedelik nie in die truspieëltjies opgemerk nie en sonder enige aanduiding langs die pad afgedraai.

Riese se onderlyf het met die slag die petroltenk van sy motorfiets getref. Sy werklike lyding het egter eers begin toe hy in die Kopanong‑ provinsiale hospitaal en daarna die Sebokeng-hospitaal in die omgewing van Vereeniging opgeneem is.

“Dit is sedertdien nagmerrie op nagmerrie,” vertel Nonna-Mari Riese aan Maroela Media nadat haar broer al langer as 50 dae lank aan ’n hospitaalbed in Sebokeng gekluister is.

Nonna-Mari vertel dat Roelof aanvanklik ná die ongeluk ure lank sonder enige pynmedikasie by Kopanong gelê het, terwyl hospitaalpersoneel geredekawel het of hy hier of eerder na Sebokeng geneem moes word.

Dit terwyl hy van die pyn gekrul het.

Roelof Riese in die hospitaal.(Foto: Verskaf)

Roelof is eindelik na Sebokeng-hospitaal oorgeplaas, waar hy ’n noodoperasie aan sy buik moes ondergaan. Roelof, ’n dieselwerktuigkundige van beroep, is ná die operasie met ’n oop wond na die waakeenheid geneem, waar hy dae lank aan ’n ventilator gekoppel was voordat hy na ’n gewone saal geskuif kon word.

Die wond het egter later vermoedelik sepsis ontwikkel en hy moes weer teater toe sodat die wond skoongemaak kon word.

“Die dokters praat nie juis met ’n mens nie. Sy blaas het boonop ná die operasie in sy buik in begin lek en loop soms uit tot op sy beddegoed. Dan lê hy in die wondvog en urine,” vertel Nonna-Mari.

Om sake te vererger is haar broer boonop ’n diabeet, en kry sommige aande nie kos in die hospitaal nie.

“Dit breek ons harte.”

Roelof Riese se motorfiets ná die ongeluk. (Foto: Verskaf)

Roelof se familie mag hom gedurende vlak 2 van die afsonderingstydperk glad nie in die hospitaal besoek het nie, maar word darem nou gedurende vlak 1 toegelaat om elke dag 15 minute lank in te loer.

Familie en vriende dra nou kos en peuselhappies aan “sodat hy darem net kan voel dat mense nog vir hom omgee”.

“Hy leef vir daardie besoektye.”

Nonna-Mari probeer intussen om R250 000 in te samel sodat haar broer in ’n private hospitaal opgeneem kan word en dié hospitaal “hom vir ons as ’n heel mens kan teruggee,” vertel sy.

Vir meer inligting rakende die fondsinsameling en Roelof se toestand, klik hier.

Maroela Media het Dinsdag reeds ’n volledige navraag aan die departement van gesondheid gestuur en wag steeds op terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

40 Kommentare

jongste oudste gewildste
Francois

Sterkte maar dit kan jy verwag van n ANC staatsbeheerde instansie en dan wil hulle dit verpligtend maak. Dit gaan net erger word suid Afrika is in baie opsigte slegter as ander Wes Afrika lande

AW

Ek is werklik jammer dat dit met hy dit moet deurmaak.

Tog

Is dit dan maar ook nie ń bewys van Hoe Sleg Dinge in alle werkkikheid is in Staats Hospitale ?

Die vraag is dan ook, as ons die Polisie so sleg sê, waarom dan ook nie die vraag vra….

Is die wat by Staats hospitale werk, so onbevoeg… en net daar om n maandelikse salaris te kry….

Kan nie die woord “Verdien” gebruik nie, want daardie waard is vir die wat “Werk” vir hulke salaris!!

Werklik net HARTSEËR!!

Diline

Al in hierdie land in ten gronde! A jy medies het en by ‘n privaat hospitaal opgeneem kan word is jy nog gelukkig. Meeste personeel in Staatshospitale is onbevoeg, lui en toon geen belangstelling om mense te dien nie, net daar vir die salaris elke maand. Verder hang hulle daar rond soos groep fotos

Shakespeare

Viva BEE Viva. Hierdie regstellende aksie met lui, onbevoegde, gewetenlose kader verpleeg personeel kom eintlik op moord neer. Het eersterangse ervaring gehad met die useless kaders. Hulle gee nie ‘n hel om nie.

Ou bees

Kyk hulle sal spuit wees as dit ek moet wees en kom lewendig daar uit.