Naka Drotské is ‘kritiek, maar stabiel’

Naka en Marzanne Drotské

Naka Drotské, die oud-Springbok-haker en Cheetah-afrigter, is aan ʼn asemhalingsmasjien gekoppel en in ʼn kritieke, maar stabiele toestand in die intensiewesorgeenheid van Mediclinic Bloemfontein.

Barbara Steenkamp, woordvoerder van die hospitaal, het aan Maroela Media gesê Drotské het Dinsdagaand ʼn terugslag gehad en is in ʼn kritieke toestand in die hospitaal opgeneem weens inwendige bloeding.

“Hy het ook ʼn longinfeksie en dit is kritiek in sy toestand,” het sy verduidelik. “Hy ondergaan tans bloedoortappings. Sy ander organe is ook as gevolg van die inwendige bloeding aangetas.”

Steenkamp het benadruk Drotské is baie siek, maar tans stabiel. “Ons vertrou dat hy sal verbeter.”

Sy het gesê die familie bedank almal vir hul gebede en boodskappe van bemoediging.

Maroela Media het vroeër berig Naka het op 29 November by sy broer, Tinus Drotské, op ʼn kleinhoewe in Kameeldrift-Oos in die noorde van Pretoria gekuier toe gewapende rowers op die huis toegeslaan het. Naka is in sy regterarm, regterbors en in sy maag geskiet.