Natref-ontploffing word ondersoek

Foto: ER24.

ʼn Ondersoek is reeds aan die gang na die ontploffing Maandagoggend by die Natref-raffinadery by Sasolburg in die Vrystaat.

Sasol en Total bedryf die Natref-raffinadery. Alex Anderson, woordvoerder van Sasol, het gesê die ontploffing het omstreeks 07:45 in die gebied van die waterstofkompressors plaasgevind. “Agt mense is vir skok behandel, drie vir stofinaseming en drie vir geringe beserings.”

Volgens Anderson is Natref se nooddienste onmiddellik na die ontploffing ontplooi en is alle personeel ontruim. Die ontploffing het ʼn brand tot gevolg gehad, wat volgens Anderson teen 08:45 geblus is.

“Eenhede in die omgewing van die waterstofkompressors is gesluit. ʼn Ondersoek na die voorval is reeds begin om die oorsaak van die ontploffing vas te stel sowel as die uitwerking wat die voorval op produksie sal hê.”

Volgens Anderson neem Natref voorvalle van dié aard baie ernstig op. “Die veiligheid van ons werknemers, diensverskaffers en gemeenskap is ʼn prioriteit.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae