NB Uitgewers staan by Jacques Pauw en sy boek

Jacques Pauw, die skrywer van The President’s Keepers, by die bekendstelling van die boek in Pretoria (9 November 2017). Foto: ANA

NB Uitgewers het Vrydag in ʼn verklaring gesê die maatskappy kan nie in hierdie stadium kommentaar lewer oor die aanklagte wat vroeër vandeesweek by Lyttelton-polisiestasie in Pretoria aanhangig gemaak is nie.

“Ons is in kontak met ons prokureurs, wat direk in kontak is met die owerhede. Dit sal dus nie in hierdie stadium behoorlik wees om verder kommentaar te lewer oor berigte in die media dat die Staatsveiligheidsagentskap (SVA) ʼn klag teen Jacques Pauw, outeur van The President’s Keepers, aanhangig gemaak is nie,” het die uitgewers gesê.

“Ons kan die publiek verseker dat ons by die boek en ons dapper outeur staan. Hy het die berugte Vlakplaas-moordbendes uit die apartheidsera aan die lig gebring en is een van Suid-Afrika se mees gerespekteerde ondersoekende verslaggewers. Ons het hierdie opdrag ook aan ons prokureurs oorgedra.”

Die aanklagte, wat deur die Valke ondersoek word, volg ná ʼn dreigement vroeër vandeesweek dat die SVA van voornemens is om regstappe te neem teen Pauw en NB Uitgewers indien sekere dele van die boek nie teruggetrek word en die boek uit sirkulasie gehaal word nie.

“Ons weier om onder druk te swyg. In plaas daarvan dat hulle ondersoek instel oor dit wat in Pauw se boek onthul is oor die agentskap, insluitend dat miljoene rand van die belastingbetalers se geld gebruik is om ʼn valse parallelle intelligensie-netwerk te skep, het die SVA gekies om die ‘boodskapper te skiet’.”

Die maatskappy het bevestig dat Pauw en NB Uitgewers nietemin deur hul prokureur, Willem de Klerk, met die owerhede sal saamwerk. “Ons sal ons outeur teen enige regstappe beskerm en is dankbaar dat daar so baie burgerlike organisasies is wat hul hulp aangebied het, en die ondersteuning van die Suid-Afrikaanse publiek.”

Sedert die boek op 29 Oktober vrygestel is, is meer as 25 000 eksemplare reeds in Suid-Afrika verkoop en meer as 50 000 is bestel. The President’s Keepers is die boek wat nog die vinnigste ooit in die land verkoop het, sedert Nielsen in 2004 met hul data begin het. Dit was ook oor die naweek die wêreldwye topverkoper op Amazon.

Lees alle vorige berigte oor The President’s Keepers op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
Ada

Knap gedaan.My boek is bestel.

Jack Klok

Die feit dat Jacques Pauw ‘n boek geskryf het om ANC gruwels van korrupsie en wanbstuur en staatskaping bloot te lê is prysenswaardig. Dat hy egter gisteraand by die bekendstelling daarvan die vorige bestel aan die hare daarby ingesleep het vir watter rede ook al (publisiteit, sensasie waarde of wat ook al) en dit as “an evil system” etiketteer, vind ek laakbaar. As ek kon kies of ek onder regering wat wet en orde handhaaf, versigtig met belasting betalers se geld omgaan, aanstellings in die Staatsdiens volgens meriete doen, mildelik en slim in ontwikkelings projekte belê, hoe morele waardes handhaaf,… Lees meer »

Albert Juergen

Ons staan 100% agter Jacques Pauw en as dit moet him finansieël ook help in sy saak, kan ons nie ‘n Bank Rekening oopmaak waarin ons as publiek donasie kan inbetaal vir Jacques se verdediging nie?

willem

“Hy het die berugte Vlakplaas-moordbendes uit die apartheidsera aan die lig gebring en is een van Suid Afrika se mees gerespekteerde ondersoekende joernaliste.” Veel beter sou gewees het: “Hy is een van Suid-Afrika se mees gerespekteerde ondersoekende joernaliste.” Behalwe die politieke korrektheid wat so nougeset nagejaag word, is die verwysing na die Vlakplaas- moordbendes irrelevant en buite konteks in die hierdie debat. Vraag is: verleen die “struggle credentials” enige groter geloofwaardigheid aan die skrywer , hierdie boek en les bes aan die uitgewer ?

Kat

Ja hulle is kwaad vir die boodskapper oor die ware inbound van die boek.Skelm en korrupte lot.