Nederlandse politikus vra ingryping by SA se plaasveiligheid

Martijn van Helvert. (Foto: Wikipedia)

ʼn Lid van die Nederlandse parlement vra vir ʼn internasionale ondersoek na die “moorde, marteling en onteiening” van Suid-Afrikaanse boere.

Martijn van Helvert, ʼn lid van die Christen-Demokratiese Appèl (CDA), het Woensdag in ʼn videoboodskap gesê die Suid-Afrikaanse regering doen min om die veiligheid van boere hier te verbeter.

Die CDA is deel van Nederland se regerende koalisie en Van Helvert word as ʼn gerespekteerde politikus beskou.

Hy het aan Maroela Media gesê sommige verregses gebruik egter die kwessie van plaasveiligheid om hulle eie rassistiese agenda te bevorder, wat beteken dat gematigde politici om dié rede vermoedelik huiwerig is om hulle sterk oor die kwessie uit te spreek.

Van Helvert sê dit vererger dus die situasie vir boere.

“Daarom pleit ek vir ʼn internasionale ondersoek, deur byvoorbeeld die VN, na die moorde, marteling en onteiening van wit boere in Suid-Afrika,” sê hy.

Van Helvert, ook ʼn kampvegter vir menseregte, het gesê dit is “belangrik dat ander oë ook die probleem dophou”.

“Ek stel voor dat kenners van die VN Suid-Afrika besoek en self uitvind wat aangaan. Hulle kan met boere en die regering en betrokke organisasies praat, ʼn verslag saamstel en dit aan die VN oorhandig. Hulle kan in die verslag voorstelle doen oor wat gedoen kan word om Suid-Afrika te help om die probleem te pak,” het Van Helvert gesê.

“Na my mening lyk dit nie of Suid-Afrika die probleem meer alleen kan hanteer nie. Niks word gedoen nie. Suid-Afrika het hulp nodig om die probleem op te los.”

Hy sê ook as verskeie lande sáám aan Suid-Afrika sê dat hulle kennis neem van die vlaag misdaad in landelike gebiede, dit moontlik tot daadwerklike optrede kan lei.

Van Helvert het die Nederlandse parlement dus gevra om die kwessie nie net op bilaterale vlak nie, maar ook op multilaterale platforms, byvoorbeeld by die Europese Unie, te opper.

Jaco Kleynhans, hoof van internasionale skakeling by die Solidariteit-beweging, sê die organisasie het Van Helvert vroeër vanjaar ontmoet en verskeie kwessies, waaronder ook plaasveiligheid, met hom bespreek.

Van Helvert het sowat twee jaar gelede ook geskrewe vrae aan Nederland se minister van buitelandse sake gestel oor die kwessie van plaasveiligheid in Suid-Afrika en het die saak nou weer geopper.

Kleynhans sê Nederland en Suid-Afrika het sterk sakebande, asook ʼn historiese verbintenis. Minstens twee Nederlandse boere is die afgelope paar jaar op plase hier vermoor en talle Nederlandse maatskappye het ʼn Suid-Afrikaanse teenwoordigheid, het Kleynhans gesê.

“Ek verwag dat ʼn konstruktiewe proses hierop gaan volg. Die Nederlandse regering kan druk plaas op die Suid-Afrikaanse regering om vrae hieroor te beantwoord. Dit is ook vir Nederland van belang dat die saak hanteer word,” sê Kleynhans.

“Ek dink die punt wat Nederlandse politici wil maak, is dat die Nederlandse regering met die Suid-Afrikaanse regering in gesprek moet tree oor landelike veiligheid.”

Kleynhans sê misdaad is ʼn probleem in die hele Suid-Afrika, allermins net op die platteland of op plase, maar dat landelike en stedelike oplossings vir misdaad beduidend verskil. Hy sê landelike veiligheid is ʼn eiesoortige kwessie wat nié soos enige ander misdaad gepak kan word nie.

Hy sê ook Suid-Afrika kan nie bekostig dat die landboubedryf, vir watter rede ook al, verder in gevaar gestel word nie.

Kleynhans sê Solidariteit het op plaaslike vlak al male sonder tal die belang van landelike veiligheid onder die owerhede se aandag probeer bring, hetsy deur gesprekke met die polisiehoof of regeringslui. “Die regering het steeds nie daarvan ʼn prioriteitsmisdaad gemaak nie.

“As plaaslike remedies uitgeput is, internasionaliseer jy ʼn saak,” het Kleynhans gesê.

Moorden, martelen en onteigenen van #blanke #boeren in #ZuidAfrika gaat gewoon door. Internationaal onderzoek is nodig.

Posted by Martijn van Helvert on Tuesday, 2 July 2019

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
Pensioenaris

Dankie tog dat iemand in die buite wêreld se oë oopgegaan het! Hopelik sal daar nou aandag aan die probleem gegee word. Lyk regtig nie of ons regering enigsins belangstel in enige van ons versoeke nie.

Sirkus

Mooi só Nederland en Solidariteit.

D Meyer

Die gety is hopelik besig om te draai, maar ek vind steeds Denemarke se stilswye na die Zindzi Mandela rassistiese uitsprake as n skreiende skande. Elke individu het ook n plig om bietjie navorsing te doen en deur middel van internasionale skakeling meer en meer mense bewus van die probleem te maak.

GP

Nog n tree in die regte rigting. Baie dankbaar vir die maar ek dink daar moet meer beywer word om geleenthede te skep vir ons om hier weg te kom.

Logika

Let asb almal mooi op na wat hy sê ivm verregses.

Ek kan ook vir julle aandui dat sekere verregse organisasies deur ANC agente geskep is om ons saak te diskrediteer.

As ‘n persoon voorheen ‘n Dakar-ganger of lid van die ANC was, en nou verregs is, is die persoon waarskynlik so ‘n agent.

Wees asseblief wakker.