Nee man, Bokke!

Die Springbokke het vandag met 30 – 17 teen die Wallabies verloor. Foto: Twitter.

Morsig, slordig en rampspoedig – drie woorde wat die Springbokke se vertoning vandag in Brisbane kan beskryf.

Die Suid-Afrikaners het hul tweede agtereenvolgende nederlaag teen die Wallabies gely toe hulle met 30 – 17 verloor het. Sedert 2013 kon hulle nog nie ’n enkele toets weg van die huis teen die Aussies wen nie.

Die Bokke het ná verlede Sondag se (toe) verrassende nederlaag baie gepraat en voorspel dat hulle in die tweede wedstryd beter sal vertoon; “dinge sal beter op die veld uitgevoer word”.

Selfs Michael Hooper-hulle het gesê dat die Wallabies maar lig loop vir ’n gewonde Springbok.

Nou ja, ’n spul verbroude duikslae, swak dissipline en ’n agterlyn wat lyk asof dit eerder kantlyn as doellyn toe hardloop, het gewys dat dade belangriker as woorde op die sportveld is.

Hierdie Springbokvertoning kan met ’n getroude man vergelyk word wat al vir die afgelope twee weke beloof om die gras te sny, maar dit steeds nie gedoen het nie.

“Jy het gesê jy gaan dit doen, maar jy het nie,” kan ’n mens al die beskuldiging uit die sitkamer hoor.

Faf de Klerk het gesukkel – daardie geel kaart was darem baie onnodig – terwyl die Wallabies later die Bokke se rolmaalbewegings geneutraliseer het.

As die Suid-Afrikaners se voorspelers nie vorentoe kan dryf nie, wat gebeur dan? Niks goed nie, is die ooglopende antwoord.

Dan is hul trotse verdedigingsrekord ook daarmee heen. Die Wallabies se vier drieë in een toets is meer drieë as wat die Britse en Ierse Leeus in die hele reeks teen die Bokke kon druk.

Wanneer jou sterkpunt in ’n swakpunt verander, dan moet jy weet jy sukkel.

Handré Pollard het darem beter as verlede week geskop, terwyl Siya Kolisi se span ook die luggevegte gewen het. Maar ’n rugbywedstryd word ongelukkig op die grond gewen en die Bokke was vandag glad nie goed genoeg nie.

Kan Rassie Erasmus na Australië vlieg, of is dit reeds te laat?

  • Puntemakers:

Wallabies: Drieë: Len Ikitau (2) en Marika Koroibete (2). Doelskoppe: Quade Cooper (2). Strafskoppe: Cooper (2).

Springbokke: Drie: Lukhanyo Am. Strafskoppe: Handré Pollard (4).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

66 Kommentare

jongste oudste gewildste
Harry

Rassie sal nie kan help nie, hy kerm net oor die ref en maak videos

jou gewete

Har har se die nar, Pragtig Australie, baie bly julle raak weer die span wat julle kan wees

piet

Geen verrassing nie, was nie verlede week ‘n verrassing nie en ook nie hierdie week nie. Feit is dat ons ‘n patetiese weg-rekord in Australie het, om die waarheid te se ons het ‘n vrotterige weg-rekord as ons teen die top spanne weg van die huis of speel punt. Mens wil dit nie graag doen nie maar jy moet jou maar teen NZ opweeg en die feit van die saak is hulle presteer net so goed weg van die huis as tuis. Dis maar net ‘n teken van ‘n klas span en wat hulle onderskei van ander spanne, dis bewonderingswaardig.… Lees meer »

MAGRIETHA

1 woord swak bokke ek dink da kort n paar veranderinge – voorspelers speel nie as n eenheid nie die agterste driehoek heeltyd uit posisie uit en di onnodige wegskoppery van die bal en sodoende besit afstaan hoe skop jy die bal weg met 10min speeltyd oor

Michael

Met Nienaber wat nog nooit ‘n topligaspan afgerig het nie maar sommer springbokafrigter geword het-danksy Erasmus natuurlik-wat kon mens verwag. Kaderontplooiing nie net ‘n ANC-ding nie