‘Neem die boer in hegtenis,’ eis Majakaneng-betogers 

plaashek-pexels

Foto: Pexels

Duisende inwoners van Majakaneng in Noordwes het Woensdag na die Mooinooi-polisiestasie opgeruk om te eis dat ʼn boer in hegtenis geneem word nadat hy glo ʼn 24-jarige geskiet het toe hy lemoene op sy plaas gesteel het.

Maroela Media het vroeër berig dié boer van die Brits-omgewing moes sy plaas ontruim nadat hy glo doodsdreigemente ontvang het en daar gedreig is dat sy huis afgebrand gaan word. Verskeie betogings het opgevlam deur lede van die Majakaneng-gebied wat woedend is omdat niemand nog in hegtenis geneem is nie. Twee vragmotors en ʼn paneelwa is onder meer vroeër vandeesmaand op die N4-snelweg buite Mooinooi aan die brand gesteek.

Tebogo Ndlovu (24) is as die beweerde slagoffer geïdentifiseer. Dit is egter nog ʼn raaisel waarheen Ndlovu verdwyn het, aangesien hy sedert die voorval aangemeld is, vermis is. Dit is ook onseker of die voorval hoegenaamd plaasgevind het.

Brig. Sabata Mokgwabone, woordvoerder van die polisie, het gesê die polisie is steeds besig met hul ondersoek, maar kon tot dusver nog geen konkrete bewyse kry om enigiemand in hegtenis te neem nie.

Mokgwabone het ook gesê daar is twee getuies wat beweer hulle het die voorval sien gebeur. Dit is egter nie duidelik uit die bewerings of die slagoffer net gewond of doodgeskiet is nie. “Die polisie het nog geen gronde gevind om enigiemand in hegtenis te neem nie,” het hy gesê.

Betogers het Woensdag gesê hulle vermoed die boer het Ndlovu doodgemaak en vir die krokodille wat hy op sy plaas teel, gevoer.

Martha Ndlovu, die beweerde slagoffer se ma, het Woensdag tydens die betoging ʼn plakkaat omhoog gehou wat lees: “Ons soek Tebogo se liggaam, asseblief, Mooinooi-polisie.”

In ʼn memorandum wat die betogers aan die polisie oorhandig het, sê hulle dat hulle Ndlovu se liggaam voor die einde van die week soek, of dat hy self vorendag gebring moet word indien hy wel leef. Hulle het ook geëis dat al die betogers wat in verband met gewelddadige betogings in hegtenis geneem is, vrygelaat word.

Mpho Motlhabane, LUR vir gemeenskapsveiligheid van Noordwes, het gesê die polisie doen hul bes om die saak te ondersoek.

“Ek kan bevestig dat die polisie onvermoeid werk om die saak op te los. Ons het bloedtoetse geneem, en sal sodra die uitslae daarvan bekend gemaak word weet hoe die pad vorentoe lyk. Ons ondersoek ook ander moontlikhede wat met die saak kan help – die polisie was Dinsdag weer met die honde-eenheid op die plaas,” het hy gesê.

Geen geweld het tydens dié betoging uitgebreek nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
david ras

Ek wonder hoekom hier vir my so ‘n reukie van die Coligny gebeure uitkom..?
Is dieselfde aanhitsers wat in Coligny bedrywig was ni dalk ook hier teenwoordig nie ?
Die massa histerie en optrede lyk darem baie na mekaar…
Wonder maar net…

Andre van Coppenhagen

Wat anders kan die ou doen as om te vlug. As hy onskuldig is kan hy nie sit en wag om vermoor en sy plaas afgebrand word nie.

Ek weet

Daar was omtrent 500 betogers in taxi’s aangery na die polisie stasie. Heel vreedsaam en oor en verby binne ‘n paar uur. Was julle daar MM?

Tc

Vra ek nou dieselfde Johan!

Annatjie

En wat sou jy doen? Sit en wag soos ‘n lam ter slagting. Verseker sou hy geen polisie of weermag kry om sy veiligheid te verseker nie. Help nie om ‘n held te probeer wees nie. Dooie helde is niks vir sy gesin werd nie