Nege verdagtes, tussen 16 en 60 jaar oud, het in die landdroshof op Schweizer-Reneke in Noordwes verskyn in verband met die moord op twee familielede van die anti‑apartheidsaktivis Ahmed Kathrada.
Die hofverskyning spruit uit ʼn noodlottige roof op 1 November toe die strydros se 28-jarige familielid Moulana Ahmed Kathrada omstreeks 21:00 van die kerk af tuisgekom het, vertel kol. Adéle Myburgh, Noordwes-polisiewoordvoerder.
Twee verdagtes het hom oorval toe hy die veiligheidshek oopmaak. Hy is in die bors geskiet. Intussen het sy ma, wat in die huis was, die skoot gehoor en haar man, Yunus Kathrada (65), gevra om te gaan kyk wat gebeur.
Hy is in sy agterkop geskiet en het op die toneel gesterf, sê Myburgh. Sy seun is na ʼn hospitaal gebring, maar het met sy aankoms daar beswyk.
Die verdagtes het op die vlug geslaan sonder dat hulle iets geroof het.
Ná die voorval het die provinsiale polisie ʼn taakspan op die been gebring wat Maandag en Dinsdag nege verdagtes aangekeer het, van wie sewe op Schweizer-Reneke en twee op Taung, sowat 90 km daarvandaan. Almal word van moord en poging tot roof aangekla.
Beamptes het ook op twee voertuie en ʼn vuurwapen beslag gelê.
Die nege sou aanvanklik Woensdag in die hof verskyn het, maar hul eerste hofverskyning is tot Donderdag uitgestel, sê Myburgh.
Xolani Andrew Sotshantsha (25), Mogomotsi Moruwa (31), Abiya Jeffrey Phakoane (60), Adam Mohale (31), Sello Bamphitile (29), Godfrey Thabiso Cuna (46), Kgotso Moeletsi (29), Thato Levetti (26) en ʼn 16-jarige seun bly in aanhouding tot hul volgende hofverskyning op Woensdag 14 November. Die tienerseun word in ʼn jeugfasiliteit aangehou.
Nou wat het Moulana Ahmed in die Kerk gemaak? Dalk moskee?
Jis hulle is gou vasgetrek! Hulle gaan ook borg kry …………ne?
Baie tragies. Hoop hulle kry lewenslank.