Nehawu kondig staking aan by Landbounavorsingsraad

National Education, Health and Allied Workers’ Union (Nehawu) (Foto: Argieffoto)

Die National Education, Health and Allied Workers’ Union (Nehawu) het Vrydag gesê hy het ʼn kennisgewing van staking by die Landbounavorsingsraad (LNR) ingedien.

“Nehawu sluit tans sy interne voorbereiding af vir die staking en sal op 3 Mei ʼn nasionale vergadering belê om sy posisie en benadering tot die komende staking te konsolideer,” het die vakbond in ʼn verklaring gesê.

Die kennisgewing van staking is ingedien ná ʼn geskil wat op 9 Maart ontstaan ​​het waarna die saak op 12 Maart na die Kommissie vir Versoening, Bemiddeling en Arbitrasie (KVBA) verwys is.

Die saak is op 10 April by die KVBA ingedien vir versoening, maar die betrokke partye kon nie tot ʼn ooreenkoms kom nie, het die vakbond verduidelik.

“Die LNR se werknemers het tans geen toelaes, subsidies of enige ander voordele nie. Die organisasie het die beloning van goeie prestasie vir eers uitgestel en werksekerheid kan nie gewaarborg word nie, aangesien LNR- uitvoerende beamptes reeds afleggings in die parlement voorgestel het,” lui die verklaring.

Volgens Nehawu gaan soek navorsers groener weivelde omdat die LNR nie markverwante salarisse betaal nie.

Die vakbond het verder gesê die LNR het in ʼn kwessie van ʼn jaar drie hoof- finansiële beamptes gehad wat tot sy “verlamming” gelei het.

“Die entiteit het ʼn gekwalifiseerde oudit vir die boekjaar 2016-’17 gekry. As jy kyk na die 2016-’17-ouditverslag en die knelpunte wat tans nie aangeraak word nie, is dit hoogs waarskynlik dat daar nog ʼn gekwalifiseerde oudit vir die boekjaar 2017-’18 sal wees. Die huidige hoof- uitvoerende beampte dien nou sy derde kwartaal uit, maar die LNR het onder sy leierskap verswak en misluk,” lui die verklaring.

Die vakbond eis ʼn salarisverhoging van 12,5%, ʼn enkeltermynooreenkoms, ʼn behuisingstoelaag van R2 000 per maand asook ʼn mediesefondstoelaag van R1 500 per maand.

Hy eis verder dat ʼn prestasiebonus in 2019 toegeken moet word, asook die instelling van ʼn betaalvordering/salariskerf-stelsel, mediese versekeringsdekking vir werknemers wat vir werkdoeleindes reis, en die insluiting van GG13 en 14 (nie-bestuur) as deel van die bedingingseenheid van die Nasionale Bedingingsforum.

Luidens die verklaring is voorbereiding vir die komende staking “ʼn laaste uitweg”. “Ons doen ʼn beroep op die werkgewer om te voldoen aan al ons eise om enige ontwrigting van die normale funksionering van die LNR te voorkom,” het die vakbond gesê.